Rs 2,90,000 ṭhâmah Duhoma puh

MNF Media & Publi­city department chuan nimin khan Aizawl Press Club-ah thuthar thehdarhtute an kâwm a; Serchhip bialtu MLA Lalduhoma, ZPM leader-in MLA fund hmanga damlo a kanna zat a ziah lan leh damloin pawisa a dawn zat a inmil loh thu sawiin, Rs 2,90,000 ṭhâmah an puh.

MNF Media general secretary VL Kross­hnehzova chuan, kum 2021-22 chhungin Lalduh­oma'n damlo kan nan cheng nuai 16.42 a hmang tih sawiin, "Damlo kanna atana sum a hman hi a dik ngei em tih kan chhui zui a, thil dik lo inphûm a lo awm ngei tih kan hre chhuak a ni," a ti.

VL Krosshnehzova sawi danin, RTI Act hmanga zawhna chhan-naah, Lalduhoma hian Zoremsangi w/o H Zoram-siama, Serchhip Dinthar hnenah Rs 2,50,000 a pe anga ziah a ni a; mahse, a takah chuan Zoremsangi hnenah Rs 1,000 chiah damlo kanna atan a pe a ni. Zoremsangi hian Lalduhoma hnen aṭangin Rs 1,000 bak an dawn loh thu Serchhip MNF hruaitute hnenah a sawi a, a pasal H Zoramsiama'n a sawi bawk.

Lalduhoma chu a biala damlo a kanna tur Rs 2,49,000 ṭhâmah puhin Krosshnehzova chuan, "Mak kan ti hle. MLA zin loh bill a lâk, mipuiin a eirûk kan hriat chhuah tak vanga a kîr leh ang khan, damlo kanna sum a chhehrelh hi a damlo kan tur hi pe vat turin kan ngen a ni," a ti.

MNF Media hruaitute chuan, Lalduhoma'n a bial mipui dâwt a hrilh tam avangin a bialah a awm ngam tawh mang lo nia sawiin, tun inthlan hnai tawh takah pawh hian a bial a ṭhutchilh ngam lo a, a tlawh zeuh zeuh chauh niin an sawi.