Eiru lo turin ZPM candidate-te'n thu an tiam

November 7, 2023-a Mizoram MLA inthlanpui neih tura ZPM candidate-te chu October 24, Thawhlehni zan khan ZPM Val Upa Council-te'n MLA an nih hunah eiru lo turin thu an tiamtir.

Thu tiamna inkhawm hi Dawrpui Multipurpose Centre-ah buatsaih a ni a, Val Upa Council (VUC) chairman Lalfakzuala, IAS (Rtd)-in eiru lo turin thu a tiamtir a ni. ZPM president Lalliansawta'n an candidate-te mipui hmaa inhmelhriattirna hun a hmang.

Lalfakzuala chuan, kum 2018 inthlanpui dawnah October 24-ah tho candidate-te'n rinawmna thu an tiam tih sawiin, "Candidate thutiamna hun hmangtute hian VUC hmaah thu an tiam a ni mai lo a, ram mipui hmaah rinawmna thu an tiam avangin a pawimawh tak zet a, hun hlimawm a nih rualin a pawimawh em avangin VUC chuan urhsûn takin hun kan hmang a ni," a ti.

VUC Chairman chuan, ZPM candidate tur mi 40 zingah mi 31-in hming an ziak phawt tih a sawi a; Mizoram chhim lama candidate mi pakua, campaign leh ṭul dang vanga nizana inlan thei lote chu hun hranah rinawmna thutiam an tiamtir ve leh dawn tih a sawi.

VUC member Rinsanga, IAS (Rtd) chuan VUC kalphung leh ZPM tana an hnathawhte a sawifiah a, "Inkaihhruaina dan pêla kalsual tur vengtute kan ni. VUC hi ZPM party uaptu leh khalh ngiltu mai ni loin, phuar khawmtu a ni a, ṭul a tih huna thuràwn petu leh zilhhau ngaite zilh theitu leh thu tàwp thleng pawha siam theitu a ni," a ti.

ZPM VUC member Rinsanga, IAS (Rtd) chuan, hlemhletna a hluar chuan ramin a tuar ṭhin tih a sawi a; an candidate-te thu an tiamtir chhan chu, hlemhletna leh eirukna laka fihlim tura intiamna a nih thu a sawi.

ZPM CANDIDATE-TE INTIAMNA

■ ZPM hian kalphung thar, mipui sorkar, ram leh hnam damna, langtlang leh hlemhletna laka fihlim sorkar siam a tum a, candidate ka nih lai leh MLA ka nih hunah pawh ZPM thuthlung te, election manifesto leh vawiina rinawmna thutiam hi ka vuan tlat ang.

■ Candidate ka nih laiin Mizoram People Forum kaihhruaina leh Model Code of Conduct ka zâwm ang.

■ ZPM candidate ka nih angin MLA-a thlan tlin ka nih chuan ka chunga thuneitute thu chu engkimah ka zâwm ang a, ka dinhmun atana an ruat apiang pawmin, ka mawhphurhna chu rinawm takin ka hlen zel ang.

■ Nomination ka file a, ka sum leh pai leh ro thil dang ka ziahna ka thehluh copy chu kar khat chhungin VUC Secretary hnenah ka thehlut ang a, hei hi hlemhletnaa inhnamhnawihna kawnga rinhlelh leh puh ka nih thulhah leh ṭul danga hman ka remti e.

■ Chhungkhat lainá leh mi dang te, tute pawh duhsakna bik lakah ka inthiarfihlim ang.

■ Pawl dang nena thawhho leh inzawm chungchangah te, nihna leh dinhmun chungchangah te, ZPM thuneitute thutlukna apiang ka pawm ang.

■ Eng dinhmunah pawh ding ila, danin hamṭhatna min pek chhungah ka nung ang a, ka dinhmun avanga hamṭhatna siam chawp theih thil dang rêng rêngah ka inhnamhnawih lo ang.

■ Rinawmna thutiam hi hriat dan inang lo a awm palh a nih chuan VUC hrilhfiahna ka zâwm ang.