MCC bawhchhiatna lian a la awm lo; Vote chhiar hunah ECI an la ngawi - CEO

Mizoram chief electoral officer (CEO) Madhup Vyas chuan nimin khan ICT conference hall-ah thuthar thehdarhtute a kâwm a; vote chhiar hun sawn leh sawn loh chungchangah Election Commission of India (ECI) aṭangin thu dawn an la neih loh thu leh Model Code of Conduct (MCC) bawhchhiatna lian tham a la awm loh thu a sawi.

Madhup Vyas chuan, ECI-in vote chhiar ní atana an ruat December 3, 2023 chu Pathianni a nih avanga a hun sawn tura ECI hnena ngenna an dawn nual thu a sawi a, "Vote chhiar ni sawn leh sawn loh hi ECI thu a ni a, vote chhiar hun sawn tura ngenna kan dawnte hi ECI hnenah kan thawn chhâwng zel. ECI aṭangin thu dawn kan la nei lo," a ti.

CEO chuan, "Sorkar hmalakna bikah depart­ment kaih­hnawih­te'n Chief Secre­tary kaih­hruai MCC Screening Committee-ah dilna an thlen zel. Hemi piah lamah hian Commission ngaihtuah zui tura thlen pahnih khat a awm. Tun dinhmunah MCC bawh­chhiatna lian tham complaint a awm lo," a ti a, Mizoram pumah MCC khauh taka kenkawh a nih thu a sawi.

Inthlana duty tura ruat, ni 30 aia rei lo duty-te lawmman (honorarium) pek an nih dawn loh chhan zawhna chhangin CEO chuan, "State sorkarah kan sum mamawhte kan thlen a, anni'n ruahmanna an lo siam ṭhin. State sorkarin ni 30 aia rei lo duty tura ruatte honorarium tur tun inthlan atan a ruahman tel lo," a ti.

Madhup Vyas chuan, nomination endiknaah returning officer (RO)-te thutlukna a pawimawh ber thu sawiin, "Anni'n dan tlawhchhana thutlukna an siam chu thu tling a ni. Lawngtlai East-a ZPM candidate Dr Lorrain Lalpekliana Chinzah chungchangah pawh RO-in thutlukna a siam a ni," a ti a, RO thutlukna angin candidate a ni thei dawn tih a sawi.

Mizoram CEO sawi danin, inthlan kaihhnawihah - zu, heroin, ganja, methamphetamine, poppy seed, meizial, khuh damdawi, gelatin, cortex, adt. tam tham tak man a ni tawh a, a vaiin cheng vbc. 36.32 hû a ni.

CEO SAWI DANGTE

■ MLA inthlan awm turah Mizoram puma vote nei zat mi 8,57,063 an ni.

■ Polling station 1,276 zinga 765-ah vote thlak lai webcasting ti tura ruahman a ni.

■ Service voter 4,975 tan electronically transmitted postal ballot management system kaltlangin e-postal ballot thawn chhuah a ni tawh.

■ In lama vote thlak tur (kum 80 chung lam leh vohbik) mi 2,092 an awm.

■ Inthlan vil turin ECI-in general observer 21, expenditure observer 14 leh police observer 11 a ruat a, Mizoram an thleng kim tawh.

■ Venhim hna thawk turin state police mi 3,000 bakah, central armed police force mi 450 rawih an ni dawn.

■ Vote thlak nía hman theih turin Pawan Hans helicopter pakhat Mualpui Helipad-ah zing dar 7 aṭanga tlai dar 4 thleng dah a ni dawn.