Global IDD Day hman a ni

Nimin khan Health Services con-ference hall-ah Global Iodine Defi-ciency Disorder Prevention Day hman a ni a, Health Services director Dr Lalremmawii khuallian a ni.

Global IDD Day hmanna hi National Health Mission state programme manager Dr R Lalchhuanawma'n a kaihruai a, laboratory assistant Laldinchhuaha'n salt testing kit (chi endikna) hman dan a entir bakah, salt testing kit sem a ni.

Dr Lalremmawii chuan, Mizoramah chuan tun dinhmunah mipui 98.8%-in iodine chi an ei tawh thu leh awrpuar an tlem tawh thu a sawi a, "Nau pai laiin iodine kan mamawh hnem ber a, iodine tlâkchham loh nan bawnghnute aṭanga thil siam te, sangha leh lui lam sate'n iodine an pai tam avangin ei uar a pawimawh," a ti.

Health Services Director chuan, nau pai laia iodine tlâkchhamin nauteah pianphunga harsatna hrang hrang, nauchhiat, hlamzuih, ṭawng thei lo, mit kalh, fùke tawi leh rilru chak lo a thlen theih thu a sawi a; nau pai laiin thyroid function test ngei ngei a ṭul thu a sawi bawk.

Khawvel pumah October 21-ah Global IDD Prevention Day hman a ni ṭhin a, kuminah hian October 21 aṭanga November 3 thlengin Global IDD Fortnight hman tur a ni a, thupui chu 'I taksa leh rilru hrisel nan iodine chi ei la, i chi búr phui takin chhìn ang che' tih a ni.