Lalsawta'n an tihsualah ngaihdam a dil

Mizoram Pradesh Congress Committee (MPCC) president Lalsawta chuan, Congress party-in thil an lo tihsual tawhah ngaihdam a dil a, tisual tawh lo turin an insiamṭha tawh niin a sawi.

Lalsawta hian nimin khan Sihphir Kawnvenga MPCC campaign office a hawnnaah thu sawiin, "Congress party-in thil tam tak kan ti tawh a, a ṭhen chu a ṭha ang a, a ṭhen chu a ṭha lo ang. Kan lo tihsual tawh tam takah ngaihdam kan dil a, tisual leh tawh lo turin kan insiamrem a, kan insiamṭha tawh. A mihring hi chu a ngai reng kan la ni ang, Congress party hruaitute pawh a ngai reng kan la ni. Mahse, kan insiamṭha a, Mizoramin hma a sâwn a, sorkar ṭha siam turin kan rawn kîr leh a ni," a ti.

BJP sorkarin India ramah indona a cho chhuak nia sawiin Lalsawta chuan, "Kan ram a tluchhe mek a ni. India ram hi pangpar chi hrang hrang mawi tak tak an vulna hmun a ni ṭhin a, hnam leh sakhaw hrang hrang lungrual takin kan lêngho ṭhin a, tunah chuan BJP-in rawng pakhat chauha siam an tum a, indona an tichhuak a ni," a ti a; Congress party erawh chuan sakhaw zalenna an chawi nung zel niin a sawi.

Lalsawta chuan, sorkar laipuia BJP vangin missionary-te'n zalen takin Pathian rawng an báwl thei tawh lo niin a sawi a; BJP-in Mizorama party an thawhpui theih tur chu MNF leh ZPM an nia sawiin, "BJP hian Mizoram BJP hi sorkartir an tum vak lo, ṭul pawh an ti lo a nih hmel. An luhká atan regional party an rawn thlang a, MNF an thawhpui mek a, ZPM hi an thawhpui leh tura an beisei mek a ni," a ti.