Quarantine facility chungchang sawiho

Chief secretary Lalnunmawia Chuau­ngo hoin May 24, Pathianni khan sorkar hotu pawimawhte'n SAD conference hall-ah phai aṭanga lo haw mek leh la haw turte dawnsawn dan tur leh sorkarin inkhung hranna hmunhma a neih sate leh neih belh dan turte an sawiho.

Lalnunmawia Chuaungo chuan, quarantine-a dah turte chu Covid-19 vei anga dawnsawn a fel loh thu sawiin, "Tangkhang lo haw turte khung hran an nih chhan chu, Covid-19 an vei vang ni loin, Covid-19 lênna hmun aṭanga lo haw an nih avangin fimkhur thu hlaah quarantine an ngai a ni," a ti.

Tangkhang lo hawte chu rapid antibody test (RAT) an paltlang (non-reactive) hnuah Covid-19 natna lan chhuah dan (symptom) an nei lo a nih chauhin quarantine facility-ah dah luh an nih ṭhin thu a sawi a; RAT-a reactive-te chu hmun hran (isolation facility)-ah dah an nih ṭhin thu sawiin, "Uluk taka enkawl zui an ni ṭhin. Red zone leh containment zone aṭanga lo hawte chu a theih chin chinah pooling of sample kaltlangin RT-PCR test an ni ang," tiin a sawi.

Chief Secretary chuan, sorkarin tunah quarantine facility a neih sate'n lo haw tur zawng zawngte a dawng zo dawn lo tih sawiin, "Khawtlang leh kohhran hmunhmate community quarantine facility (CQF) atan hman dan kawng dap zel a ṭul. Inkaihhruai­na SOP dung zuia home quarantine a theih chin chinah phalsak mai a ṭul ang," a ti.

Task Group on Quarantine Facilities chairman Esther Lalruatkimi chuan, tun dinhmuna sorkar, kohhran leh zirna-in hrang hranga quarantine centre-ah mi 14,000 vel an awm theih laiin, mi 20,000 vel awm theihna mamawh a nih thu a sawi.

Meeting-ah hian, quarantine faci­lity neih belh dan leh home quarantine chungchang sawiho a ni a; mahni ina inkhung hranna nei ṭhate chu SOP dung zuia home quarantine phalsak chungchangah, local task force-te chu inhawng zau turin an ngen. Khaw­tlangah inkhung hranna hmunhma neih a ṭul avangin veng/khua zawng zawngte chu CQF an neih theih nan hma la tura ngen leh hriattir ni se, an ti.

An tarlan danin, tun dinhmunah sorkar quarantine facility-ah mi 1,222, kohhran hall hrang hrangah mi 203, home quarantine-ah mi 74 leh man chawiin hotel-ah mi pasarih an inkhung mek a ni.

#    Home quarantine phalna pek chung­changah, task force-te tan hnathawh a awlsam zawk nan an lo endik tur checklist siam ni se.

#    Quarantine facility-te daihzai zawka hman a nih theih nan veng inṭhen­awmte chu an CQF-te an inhman ṭâwm theih nan inremsiam dan kawng dap ni se.

#    Quarantine-a awm turte'n mattress tih loh chu mutbu leh ṭul dangte anmahni intum ṭhin tawh se.