Cyber leh social media kaihhnawihah naupangte fimkhurpui turin chah

Cyber Security Awareness Month pualin Information & Communication Techno-logy (ICT) department chuan Cyber Security chungchangah nimin khan mipui hriat tur a tichhhuak a; kumtling-lote'n social media an hman nasat tawh avangin fimkhurpui an ngai tih an tarlang.

ICT department chuan, cyber security chungchang inzirtirna, Cyber Jagrookta Diwas chu kum 2022 khan India ramah mumal taka ṭan a nih thu leh chumi pual chuan October thla chu Cyber Security Awareness Month atan hman a nih thu an tarlang a; cyber kaihhnawiha harsatna neite chu an aia thiam zawkte ráwn tur leh a ṭul chuan police station-ah thlen turin a chah.

ICT DEPARTMENT TARLANTE

▶ Kumtlinglote'n social media an hman nasat tawh avangin fimkhurpui an ngai em em a, anmahni enkawltute'n an thil tih ṭhin hriatpui a pawimawh.

▶ Sum leh pai kaihhnawihah miin an bum loh nan te, mi dang tana harsatna thlentu an nih loh nan te, chutiang vanga harsatna an tawh loh nante social media an hman dan hriatpui a pawimawh.

▶ Online khawvelah sum leh pai kaihhnawiha mi dang bum tum an tam tawh a, hriat chian loh hnena pawisa thawn te, tláwm uchuak taka thil zawrhte rinhlelh a ṭha.

▶ Online shop-ah cash on delivery tih theih leh return phal ngeite chauh dawr ṭhin tur.

▶ Sum leh pai duhâm lutuk vangin khaw hmu lo lêkin a awm theih a, fimkhur a har ṭhin. Sum leh pai lak luh chungchangah rilru thianghlim tak puin social media hman tur a ni.

▶ Mipat hmeichhiatna kaihhnawih thilah danin a phal loh thil tih loh tur a ni a, mi dang tihtirtuah ṭan loh tur.

▶ Mihring hlutna leh zahawmna hi hun rei lo te chhungin mipat hmeichhiatna kaihhnawihah a hloh theih a, insûm theihna hian zahawmna a keng tih hriat a ṭha.

▶ Thuthar thehdarh hmasatu nih châk lutuk avang hian thu dik tâwk lo thehdarh palh theih a ni, a dik leh dik loh finfiah hmasak zel tur.

▶ Cyber crime kaihhnawih dan, IT Act, 2000 Section 43, 66 leh 67-te bakah, IPC Section 464, 468, 469 leh a dangte sorkarin khawng takin a kengkawh.