MLA candidate zinga upa ber Tawnluia: Kum 40 chin hnuai lam mi 18 an awm

November 7, 2023-a Mizoram Assembly inthlanpui neih tura candidate tur mi 170 zingah Tuichang biala MNF candidate Tawnluia a upa ber a, kum 31 mi pahnih awmin, candidate zinga naupang ber an ni. Candidate zingah kum 40 chin hnuai lam mi 18 an awm.

Kumin inthlanpui chuh turin assembly constituency 40-ah mi 174-in hming an pe lut a, bial pahnih ṭheuh chuh tur mi pali an awm avangin candidate mihring zat chu mi 170 an ni. Mi 170 zinga upa ber Tawnluia chu kum 80 a ni a, a naupang ber pahnih - Tuirial biala BJP candidate F Vanhmingthanga leh Aizawl North-I leh Aizawl East-I biala Lalpa Chhiahhlawh Intelkhawm (LCI) independent candidate Lalruatfeli Hlawndo te chu kum 31 ve ve an ni.

Candidate upa ber Tawnluia bakah hian kum 70 chung lam mi pasarih an awm a; Tawnluia dawta upa ber chu MNF chief ministerial candidate Zoramthanga niin, kum 79 a ni.

Kum 70 chung lam mi dangte chu - Congress party (INC) CM candidate Lalsawta (kum 77), Aizawl North-III biala INC candidate Lal Thanzara (74), Aizawl North-I biala MNF candidate R Lalzirliana (74), Lunglei North biala LCI (independent) candidate K Lalrimawia (74), ZPM CM candidate Lalduhoma (73) leh, Lawngtlai West biala BJP candidate JB Rualchhinga (71)-te an ni.

Mi 170 zingah kum 40 leh a hnuai lam mi 18 an awm a, kum 41-50 inkar mi 59, kum 51-60 inkar mi 43 leh kum 61-70 inkar mi 42 an awm bawk. Candidate-te kum chawhrual chu 53.08 a ni a; candidate mipate kum chawhrual chu 54.17 niin, hmeichhiate kum chawhrual chu 46.2 a ni thung.

Serlui biala ding candidate mi pangate kum chawhrual chu 43.8 niin, kum chawhruala an naupan tlanna ber bial a ni a; Lawngtlai West biala ding tur candidate pangate kum chawhrual chu 62.2 a ni thung a, kum chawhruala an upat tlanna ber bial a ni.

Aizawl East-II chu candidate-te kum inrual tlànna ber a ni a; candidate panga awmin, kum 47 mi pathum, kum 48 mi pakhat leh kum 49 mi pakhat an ni.