MSU hruaitu 9 mante chhuah an ni NGO-te'n Tuichhawngchhuah thiah phût

February 26, 2016 chawhnu lama Tuichawngchhuah Primary School a kan hnuah zan 11 velah police-te'n Mizo Students Union (MSU) hruaitu pakua an man a, Lunglei District Jail aṭangin Inrinni chhun khan an chhuah. Hetih lai hian, Joint NGO Coordination Committee chuan Tuichawngchhuah chu dan loa din a nih avangin ṭhiat thuai turin sorkar an phût.

Tuichhawngchhuah P/S a kan avanga hian MSU general headquarters president PC Lalrinhlua leh hruaitu dang palite bakah MSU regional headquarters, Lunglei vice president Lalrinngheta Sailo leh hruaitu dang pathumte man an ni.

MSU hruaitute sawi danin, MSU hruaitute hi February 26 khan Tuichawngchhuahah an kal a, an awm laiin chawhnu lamah sikul chu a kâng. MSU hruaitute'n Lunglei an pan laiin, kawng lakah police-in an lo man a; chief judicial magistrate Dr HTC Lalrin-chhana thupekin District Jail-ah dah an ni.

Lunglei MSU hruaitute chuan Inrinni zing khan Lunglei DC Abhijit Vijay Chauduri leh SP hmuin, Inrinni chawhnu dar 2 rîk hmaa intiamkamna awm loa chhuah turin an ngen a; mahse chawhnu dar 2 thlenga chhuah an nih loh avangin zirlaite chu DC pisa tualah an pung khawm a, zirlai ṭhenkhatin Lunglei Electric Venga Chakma Rest House an pan bawk. Buaina liam zawk a chhuah hmain MSU hruaitute chu Inrinni chawhnu dar 3 vel khan chhuah an ni.

MSU thuchhuah chuan, an hruaitute'n Tuichawngchhuaha in pakhat an ṭhiahsak hnuah chawhnu dar 2 velah khua an chhuahsan a, khua an chhuahsan hnu chawhnu dar 3 velah Tuichawngchhuah P/S a kâng tih an hriat thu leh pawi an tih an tarlang.

MSU chuan, "Chakmate'n dik lo taka MSU hruaitute tâl awhtir a, Mizo mipuite dik lo taka min hêk an tumna niin kan hria a, kan hruaitute a hmuna awm lai pawhin anmahni inte pawh MSU suasam ni âwm taka lang thei turin an lo sâwngbâwl a ni. Dik lo taka Mizo mipuite min hêkna turin anmahni ngeiin sikul hi an hâl ni ngeiah kan ngai," an ti.

MSU tarlan danin, Tuichawng khaw per, Tuichawngchhuahah hian a tirah chuan Chakma ho in 30 vel an awm a, dan loin an awm ngeia an ngaih avangin MSU chuan November 2015 khan chhuak turin hriattirna an pe. Mizoram sorkara LAD pawhin February 10, 2016 khan khua chhuahsan turin a hriattir bawk.

Tuichawngchhuah P/S kâng chung-changah hian MSU general secretary Lalremruata Chhangte chuan Inrinni khan Lunglei Police Station-ah FIR a thehlut.

FIR-ah chuan, Tuichawngchhuah P/S kâng chu Mizoram Chakma Alliance Against Discrimination (MCAAD), Delhi intite'n MSU tihah puhin, an president Paritosh Chakma hminga thuchhuah an siam chu media hrang hrangah a darh bakah MSU-te chu Chakmate tihluihnaa chhuahtir tumah an puh thu a tarlang.

MSU General Secretary chuan, MCAAD thuchhuah aṭangin sikul kâng chu MSU leh Mizote khawvel mithmuha tihmualpho nana rua-hmanna fel tak neia tih nia an rin thu ziakin, sikul kânga mawhphurtu leh MSU-te mualpho taka puhtu MCAAD intite leh an president-te chu an phû tâwk hrem an nih theih nan a ṭul anga hma la turin a ngen a ni.

Aizawla Joint NGO Coordination Committee, Lungleia Joint NGO leh Lungsen Joint NGO-te chuan a hranpa ṭheuha thuchhuah siamin, Tui-chawngchhuah P/S a kan vanga MSU hruaitute man an ni chu an dem thu leh, Tuichawngchhuah khua (bâwk) chu sorkarin ṭhiat thuai se an duh thu an tarlang.

Joint NGO Coordination Committee chuan, MSU hruaitute man an ni leh finfiahna hmuh a nih hmaa a na thei ang bera thubuai siamsak an ni chu pawi an tih thu an tarlang a, "Thu delhkilh awm loa chhuah vat turin sorkar kan phût. Tuichawng-chhuaha dan loa Chakma khaw din sorkar order-a ni 21.1.2016 hmaa chhuahsan tura a lo tih tawh pawh a rang thei ang bera tihhlawhtlin a nih theih nan sorkarin hma la rawh se," an ti. Press release-ah hian Central YMA, MUP, MZP leh MSU aiawhte'n hming an ziak a ni.

Lunglei Joint NGO chuan, "Tun hnuah finfiahna awm loa hnam issue-ah kan NGO hruaitute, tute pawh ni se man an nih ngawt tawh lohna turin Joint NGO-te chuan thuneitute kan ngen a, kan beisei bawk," an ti a; Tuichawngchhuaha sikul a kan chungchanga MSU-in FIR an thehluh chu a rang thei ang bera bawhzui turin thuneitute an ngen a ni. Lunglei Joint NGO-ah hian YMA, MUP, ZoRO, PRISM, Chhimbial Chhantu, MZP leh MSU-te an tel.

Lungsen Joint NGO pawhin, "Tuichawng-chhuah thlawhbâwk, dan loa din hi a rang thei ang berin Takam ho hian chhuahsan rawh se. An chhuahsan lo a nih chuan a ṭul angin hma kan la zel ang," an ti.