Director-in hnathawh enfiah

Urban Development & Poverty Alleviation (UDPA) director Zorammuana chuan, Inrinni khan Lunglei khawpui chhunga UDPA department hnuaia hnathawh kal lai, Lunglei Convention Centre leh Lena Sports Stadium sak mek a tlawh a, hnathawh dan a enfiah.

Zorammuana chuan, Convention Centre leh sports stadium sak mek chu a hun taka zawh a nih theih nan department-in a ṭul anga hma a lak zel thu a sawi a, hna thawktute chu chak zawka hna thawh a nih theih dan tur a sawipui.

Lena Stadium siam hna hi Ministry of Urban Development-in sum an pek chhuah theih rih loh avangin chawlhsan lailâwk a ni a; hemi chung-changah hian UDPA Director chuan sorkar laipui dâwr mek a nih thu a sawi.

Sports Stadium sakna atan cheng nuai 2418.08 ruahman a ni a, tunah 47% vel hna thawh zawh a ni tawh. Lunglei Convention Centre hi cheng nuai 1877.40 sênga siam tur a ni a, tun dinhmunah 99% thawh zawh a ni tawh thung. Zorammuana chuan hun tiam chhunga thawk zo ngei turin hnathawktute a hrilh.