National Science Day lawm

Mizoram Science, Technology & Innovation Council (MISTIC) bul tumin Inrinni khan Vanapa Hall-ah National Science Day 2016 lawm a ni a, Planning minister Lalsawta'n a hmanpui.

Lalsawta chuan, ni tin khawsaknaah awl-sam, rang leh hlâwk zawka hna thawhna atan science chhawr ṭangkai a pawimawh tih a sawi a, "Hmasawnna kawnga pên thum pên turah hmanrua leh khawl ṭangkai siam chhuah hi pên khatna a ni. A chhawr ṭangkai thei tur mipuite hnena thiamna hlan chhawn a, chuta tanga an thil siam chhuahte deh ralna tur lam buatsaih chu ke pên lehna tur a ni," a ti.

Planning Minister chuan, National Science Day puala exhibition buatsaiha khawl thar ṭha leh ṭangkai tak tak tur pho chhuahte chuan Mizopa thluakin phak loh a neih bik lohzia a lantir thu a sawi a; thil siam pho chhuak-tute chu an theihna leh thiamnate ram tana
ṭang-kai taka hmang turin a chah.

Planning secretary Dr C Vanlalramsanga pawhin thu sawiin, "Science leh technology chuan thingtlang khaw kilkhâwr ber thlenga a nghawng vek avangin a pawimawhzia hriat a, inzirtir uar deuh deuh a ṭul," a ti.

India scientist Sir CV Raman-a’n February 28, 1928-a Raman Effect a hmuh chhuah ní hriat reng nan, kum 1987 aṭang khan February 28 hi National Science Day-ah hman ṭhin a ni a; kuminah chuan February 28 hi Pathianni a nih avangin Inrinni khan hman a ni.