Medical college neih theih nana pui turin Health Minister-in Union Minister ngen

Health minister Lal Thanzara chu February 27, 2016 khan Civil Services Officers' Institute (CSOI), New Delhi-a Health & Family Welfare Central Council Conference vawi 12-naah a tel a; Mizoramin medical college a neih ngei theihna atana ṭan lâkpui turin Union Health Minister a ngen.

Conference-ah hian National Health Policy puanzarna hun hman a ni a, Union Minister for Health & Family Welfare JP Nadda-a'n a kaihruai a; MP-te leh state hrang hranga Health minister-te bakah, Health & Family Welfare ministry-a hotute an tel.

Lal Thanzara chuan, India ramah medical college 422 a awm tawh laiin, Mizoramin medical college a la neih ve loh thu a sawi a; Union Health minister JP Nadda leh Health & Family Welfare ministry hotute chu Mizoramin medical college an neih ngei theih nan leh Medical Council of India norms harsa lutuk chungchangah Mizoram chu ngaihhnathiam turin a ngen.

Health minister Lal Thanzara chuan, internet leh broadband Mizoramin a neih ṭhat tawk loh avangin health sector-a data lak khawmah harsatna a awm thu a sawi a; internet ṭhat loh vangin teleme-dicine leh video conferencing an neih ṭhat theih loh thu a sawi bawk.

Hetih lai hian, Lal Thanzara chuan, sorkar kum thar aṭang chuan National AIDS Control Organisation (NACO) aṭanga sum hmuh tur reng reng chu Mizoram state sorkara Finance department kaltlang kher loa MSACS account-a thun luh zel a nih tawh tur thu Unian Finance Minister-in a phal-sak tih Vanglaini palai a hrilh.