MNF-in Mizoram independence-a puan Champha vawi 50-na an lawm dawn

MNF hruaitute chuan Inrinni khan Aizawl Press Club-ah thuthar thehdarhtute kâwmin, March 1, 1966-a Mizoram independence-a an puan champha kum 50-na, golden jubilee an lawm tur an sawifiah.

MNF senior vice pre-sident Tawnluia chuan, October 21, 1961-a Mizo National Front din a nihin an thil tum chu 'Zalenna sang bera neia Mizo hnahthlak zawng zawngte rorelna pakhat hnuaia inzawmkhawm, Mizo hnam tihhmasawn leh chawikan, Kristian sakhua humhalh tlat' tih a nih thu a sawi.

Tawnluia chuan, 'Mizote hi Mongolian thlah kan ni a, tuma tihbuai lohin lal neiin kan awm a, Aryan/Dravidian thlah kan ni lo a, India mi kan ni ngai lo...' tih chu MNF-te dinna a nih thu a sawi a, "MNF chuan tharum tel loin, thu leh hla hmangin Mizote mahnia ro inrêla awm theihna atana kan hmalakna India sorkarin a tipuitling lo mai ni loin, MNF nuai chimit turin sipai tam tak a rawn tir lut a ni," a ti.

MNF Senior Vice Pre-sident sawi danin, MNF chuan India sipaite rahbehna hnuaia kûn duh loin, March 1, 1996-ah Declaration of Independence an puang a; chumi hnuah MNF hruaitute leh hnam sipaite chu an rammû a ni.

Zalenna an sualnaah hlawhtling rih lo mah se, Pathian hruainain engtikah emaw Mizote'n zalenna famkim an neih ngei an rin thu sawiin Tawnluia chuan, "Zo hnahthlakte hmun hrang hranga ṭhendarha kan awm hi inzawmkhawm a, rorelna pakhat hnuaia zalenna nei kan awm theihna atan MNF chuan kan thawk zel dawn," a ti.

Mizoram indepen-dence-a puan Golden Jubilee hi a lawmna pui ber chu March 1, 2016 hian Vanapa Hall-ah neih a ni dawn a, MNF chuan mi zawng zawng tel turin an sáwm a ni.