KHAWTHLIR

Sub-station tlawh

Power & Electricity secretary Rajiv Kumar Gupta leh engineer-in-chief Lalnghinglova Pachuau-te chuan, February 26 khan 132kV Sub-station & Mini Hydel project, Khawiva, Kawmzawl-a bun mek 33kV Sub-station leh Pukpuia 5kW Wind Solar Hybrid Sytem hmunte an tlawh a, hnathawh mek a nih dan leh hmanruate an enfiah.

Darzo lei

Chhimtuipui Darzo kâia lei dawh mek chu nimin zing khan PWD chief engineer K Lalsawmvela'n a tlawh a; lei dawh chu kumin March thla tàwpah zawh an tum thu, a dawhtu Niyogi Associates hotute'n an lo hrilh. Darzo kaia lei dawh hi an dawh zawh
ṭêp tawh laiin, December 13, 2014 khan a chim a; anchor block hruipui invêt chu kilh ngheh tawk loh vanga chim nia hriat niin, tunah chuan a hruipui lawr chu ft. 12 vela tihsei a nih bakah, a kilhna u-bolt pawh pasarih an dah tawh a ni.

Pro. Pastor la lut

Baptist Church of Mizoram (BCM) chuan nimin khan Lunglei Zo-tlang BCM biak-inah probationary pastor atana an lak thar mi pariatte lak luhna inkhawm (induction service) a buatsaih, Pro. pastor tharte hi BCM general secretary Rev. H Lianngaia, presiding minister atana ruatin a la lut a; Christian Education director Rev. V Vanlalchhunga'n a ṭawngṭaisak a ni.

Heroin man

Kawnpui police leh Kawnpui Vengthar branch YMA ṭangkawp chuan, nimin khan heroin chin sen 50 leh a neitua puh Samson Vanlalpeka (24) leh Zodinmawia (32) Kawnpui Venglai ve ve an man a; tualchhung rate-a chhutin Rs. 25,000 man a ni.

YMA seminar

YMA sub-headquarters, Serchhip hnuaia Kumpuan Committee-te chuan Inrinni khan Serchhip Hmarveng YMA Hall-ah Serchhip khawpui chhunga YMA branch YMA hrang hrang office bearer-te pualin 'Kumpuan Seminar cum Leadership Training' an buatsaih. Seminar-ah hian YMA kumpuan 'Ram leh hnam humhalh' tih chu Central YMA finance secratary Lalrochuanga'n a sawi a ni.