Hmeichhe chunga hleilenna dona atan Signature Campaign buatsaih a ni

Mizoram State Legal Services Authority (MSLSA), All Mizo-ram Women Federation (AMWF), People United in Music with a Purpose (PUMP) leh Centre for Peace and Development (CPD)-te chuan In-rinni khan Millennium Centre kawtah hmeichhe chunga hlei-lenna leh kutthlak lo tura intiam-kamna hming ziah, Signa-ture Campaign hun an hmang.

'One billion rising cum signature campaign and Pre-International Women's Day' hmanna hi AMWF president Dr Jane R Ralte-in a kaihruai a; thu sawiin, khawvel-a mihring tluklekdingawn 7 zinga a zatve vel chu hmeichhia an ni a, khawvela hmei-chhia hmun thuma ṭhena hmun khat chuan an dam chhungin vuak, pawngsual leh tihduhdahna an tawk niin a sawi.

Dr Jane Ralte sawi danin, Mizoramah in chhung khura hmeichhe laka hleilenna (domestic violence) a la nasa a; kum 2012-13 khan case 67, kum 2013-14 ah case 55 leh kum 2014-15 ah case 109 a awm. Hmeichhia pawng-sualah erawh Mizoram dinhmun a ṭha hret hret a; kum 2012-13 ah pawngsual case 41, kum 2013-14 ah case 25 leh kum 2013-14 ah case 18 a awm a ni.

Hetih lai hian, CID (Crime) report-a a lan dan-in, kum 2015 chhung khan Mizoramah hmeichhe chunga hleilenna thubuai 303 ziah luh a ni. Chu'ng zinga 77 chu pawngsual thubuai a ni a, hmeichhe zahawmna tihbawrhbânna thubuai 80, pasalte kut tuara thi hmeichhia 11 an awm. Kumin January thla chhung khan hmeichhe chunga hleilenna thubuai 24 awmin, chung zinga panga chu pawngsual thubuai a ni.

Millennium Centre kawta hun an hmannaah hian advocate pahnih - Lalfamkimi leh T Lalnunsiama ten domestic violence chungchang an sawifiah bawk.