Vawiinah sumdawnna lirtheite Mizoram pumah an tlân dawn lo
Commercial Vehicle Joint Action Committee (CVJAC) chuan, nimin khan Aizawl Press Club-ah thuthar thehdarhtute an kâwm a; sorkar nena inbiak phût nen leh lungawi lohna lantir nan vawiin hian Mizoram pumah sumdawnna lirtheite an tlân dawn loh thu an puang.
CVJAC hruaitute chuan, lirtheia chhiah lak a nih dan leh taxi leh bus thlak theih loh tura tih a nih chungchangah thuneitute biak tuma an dawr thu an sawi a, "Thuneitute'n kan sâwmna an chháng lo. Chhiah tihsan ngawr ngawr hi kan do a ni lo a, kan harsatna neihte min sawipui leh chinfelpui tura kan ngennain awmzia a nei lo a ni," an ti.
CVJAC chairman Malsawmtluanga sawi danin, an harsatna tawhte sawipui tura ngenna chu February 15, 2016-ah Transport Secretary hnenah an thawn a, chhànna an dawng lo. February 27-ah Chief Minister hnenah inbe tura ngenna an thawn leh a, chhanna an dawng lo bawk a ni.
Malsawmtluanga chuan, chhiah tihpun ngawr ngawr an dodal lo tih sawiin, "Chhiah hi chu tihpun a ngai a, tihpun hi kan sawisel lo. Kan sorkar dinhmun enin tihpun âwmah pawh kan ngai. Mahse, a pek dan tur kalhmang leh tihpun a nih dan hi ṭha kan ti lo a, chuvangin sorkar nena sawiho kan duh a ni. Life time tax hi state tam takah an kalpui loh bakah, vawi khata chhiah pek vek pawh an ti lo," a ti.
CVJAC general secretary Jeffrey L Fanai chuan, lungawi lohna an lantir tur chhan chu, taxi intlân chhâwktir, chhiah tihsan leh life time tax duh loh vang ringawt a nih loh thu sawiin, "A phêna thil inthup leh hriatthiam loh kan neihte sawihopui tura kan phût min tihhlawhtlin sak duh lo hi hriatthiam harsa kan ti," a ti a; an harsatna neihte sawipui tura sorkar an phût thu a sawi.
Jeffrey L Fanai chuan, life time tax leh 6% motor registration tih ngai hi sorkar laipui thuchhuak a nih pawhin, India ram state tam takin an la hmang lo tih a sawi a, "Chhiah thar emaw, pawisa chawi ngai thar a awma hmang hmasa pawl nih tum ziah a, kan hamṭhatna tur leh mipuiin kan chhawr
ṭangkai theihna tura vuaichâ leh viau ṭhin si hi ṭha kan ti lo," a ti.
Jeffrey L Fanai sawi danin, life time tax cháwi tur lirtheite'n chhiah an pek hnuah accident tawkin emaw, bo palh se an chhiah pek tawh lâk kîr theih a ni lo. Life time tax pek tur rate chhûtna atan tun dinhmuna motor man hman a ni a, lirthei man sang zel mah se, tun dinhmunah chuan chhiah chawi tur a inang vek a ni.
CVJAC-in lifetime tax a nih avanga vawi khata pek kher chu ṭha an ti lo tih sawiin CAJAC GS chuan, "Sorkar hian lifetime tax lak a tum lui tlat a nih pawhin, ruahmanna felfai siam hmasa se, lirtheia eizawngtute tana harsatna awm lo tura refund system leh mode of payment instalment-a pek thei dan tur siam phawt ni se kan duh. Motor hlui pawh tuna motor man aṭanga chhûta lifetime tax lak tum phei hi chu a dik lo hrim hrim a ni," a ti.
CVJAC hruaitute chuan, Central Motor Vehicles Rules, 1988-in sumdawnna lirtheite chu a hlui tawh emaw, siamṭhat leh tlak loa accident a tawk a nih chuan replacement tih a phalsak thu sawiin, "Hei hi state dangah pawh an kalpui mek," an ti a; Mizoram sorkar chuan chhiah chawi tura state dang tihdan ti si a, replacement chungchanga state dang tihdan leh sorkar laipui tihdan a entawn duh lo niin an sawi.
Chhiah tihsan a nih laia hnathawh hun tihtlem chu ṭha lo an tih sawiin CVJAC hruaitute chuan, "Hna thawh hun min tihtlemsak dawn a nih rau rau chuan, kan chhiah chawi tur leh life time tax tal hi la rih lo se. Chhiah tisang bawk, hnathawh hun titlem leh bawk si hi hriatthiam a har a ni," an ti.
CAJAC hruaitute chuan, chanchinbu kaltlangin Transport Minister-in, 'Emergency-ah chuan road permit lak a ngai lo' tiin a sawi tih an hriat thu sawiin, "A lawmawm kan ti a, mahse, ṭawngka mai ni lo, ziak ngeia order chhuah ni se kan ngaih a ngam ang," an ti a; chuti a nih loh chuan Aizawl páwn lamah chhuakin, accident tawk ila, insurance company-ah harsatna an tawh tho an rin thu an sawi.
CVJAC hruaitute sawi danin, sorkar nena inbiak phûtna leh an lungawi lohna lantirna atan vawiinah sumdawnna lirthei zawng zawngte an tlantir lo phawt dawn a; sorkar aṭanga thu lawmawm an hmuh loh chuan an kal zel dan tur an ngaihtuah zui dawn a ni.