ZNP Vice President-in MNF Party a zawm

ZNP vice president K Liantlinga leh ZNP-a a thurualpui mi ṭhenkhatte chuan, nimin khan MNF party an zawm a, Mizo Hnam Runah anmahni lawmluhna inkhawm nei a ni. K Liantlinga chuan, “Vawiin hian Mizo nationalism tihlawhtling turin kan inpuiah kan lo hâwng a ni," a ti.

K Liantlinga chuan, ZNP party chhuahsan mah se, an dem ngawt thei lo tih sawiin, "ZNP President nen inhmuh thiam lohna leh inhuatna engmah kan nei hran lo," a ti a; ram leh hnam tana rawngbawl tur leh humhim turin MNF zawm chu tihmâkmawha an ngaih vangin an zawm niin a sawi.

ZNP-ah vice president niin, ZNP aṭangin MLA-ah pawh thlan tlin ni tawh mah se, ZNP mite'n beiseina sang tak awmze nei si lo an nei chu lainatawm a tih thu sawiin, Liantlinga chuan, "MLA pakhat pawh nei lo, kan thlir leh nghahfâk ber sorkar tik ni hi a her chhuak dawn lo tih hi a chiang tâwkin ka hria. Kan mipuite beidawng lutuka siama a tâwpa khâm koa tlâkpui emaw, tui thûk taka tlakpui emaw ai chuan, Mizorama regional party lian ber hi ka rawn belhpui ta a ni," a ti.

MNF president Zoram-thanga chuan lawm luhna thu sawiin, “ZNP unaute hi hnam thinlunga tui em em an ni a, an hotu pawimawh tak takte nen inzawm khawmna kan nei hi a inhmeh hle. Vawiina MNF rawn zawmtu ZNP hruaitute hi malsawmna ruai ṭheh huna a fatu turte an ni,” a ti a; ZNP hotu MNF zawm tate nen sengkhawm hna thawktu tur forum siam a nih tur thu leh, Zoram dung leh vângah fehchhuah programme siam a nih dawn thu a sawi.

ZNP hruaitu, MNF zawm tate zingah hian ZNP Political Affairs Committee member leh general sec-retary R Vanlaltluanga, general secretary dang pahnih, secretary panga leh ZNP ṭhalai vice president K Ramsangzuala bakah, mi dang 170 vel an tel.