Eiruknain state chakna a eichhia - CM

Nimin khan ACB conference hall-ah 'Training by CBI Academy on Course on Anti Corruption Law on Investigation Cases' hawn a ni a; training hawngtu, chief minister Lal Thanhawla chuan, eiruknain state chakna thahrui a ei chhiat thu a sawi.

Chief Minister chuan, corruption avangin project pawimawh tak tak, ṭangkai tak tak tur a hunah thawh zawh theih a nih loh ṭhin thu a sawi a, "Corruption inrawlhna project-te chu thawh zawh a nih pawhin a quality a chhe ṭhin. Corruption hian society a tichhia a, sorkar a tihmélhem. A tuartu ber chu mipuite an ni. Corruption hi ram leh hnam hmelma lian tak a ni," a ti.

Mirethei leh ṭanpui ngai ngawih ngawihte tan programme ṭha tak tak duan ṭhin a nih thu sawiin Lal Thanhawla chuan, "Heng programme hnuaia miretheite
ṭanpuina tura ruahmante a dawng turte hnenah a thleng kim lo tih ngaihdan mipui rilruah a awm ṭhin," a ti a; chutiang thil chu ngaithah lo a, a reh theihna atana ngaihtuahna sên a ṭul tak zet thu a sawi.

CM Hawla chuan, zangnadawmna chungchangah Land Revenue & Settle-ment department pawh an fimkhur a
ṭul tih sawiin, "Lawyer ṭhenkhat mi lo fuihpawrh a, a hlâwkna insempui ṭhin an awm. Heng mite avang hian Mizoramin harsatna tam tak a tawh phah a, heng hi theihtawp chhuaha do a ṭul a ni," a ti.

Training-ah hian ACB aṭangin mi 17 leh Mizoram police aṭangin mi 22 an tel dawn a; CBI Academy, Ghaziabad-a mite'n eiruk thubuai chhuina atana thil pawi-mawh hrang hrangte an zirtir dawn a ni.