KHAWTHLIR

Swachch Bharat

Pachhunga University College chuan, nimin khan an college campus-ah Swachch Bharat (Clean India) campaign an hmang. Campaign hi vice principal Prof. JV Hluna'n a kaihruai a; assistant professor Dr Zoramdinthara kaihhruaiin zirlaite'n faina thutiam an chham rual. Zirlaite chu chawlh-kar khatah darkar hnih tal thil tifai tur te, bawhhlawh paih mai mai lo tur te, faina kawnga mi 100 tal kaihruai thei tur leh faina kawnga nasa zawka ke pên turin an intiam a ni.

Tlawng humhalh

PHE department leh Maubawk branch YMA ṭangkawp chuan, Tlawng lui, Tuithum chhuah aṭanga PHE Phase-II tui laknain a khuah lî huam chhunga nungchate a humhalh tlat tih an tarlang. PHE leh Maubawk YMA-te chuan, lui an humhalh chhungah Pa-thianni khan sangha thi hmuh a nih thu tarlangin, pawi an tih thu an sawi a; Tlawng luia nungcha an humhalhnaah mipui
ṭawiawmna an ngen a ni.

MNYF rally

MNF ṭhalaite chuan nimin khan vawiina an party-in Mizoram independence puan champha vawi 50-na an lawm tur urlawkna atan hian khan rally an buatsaih a, Vanapa Hall kawtah inkhawm tawi an buatsaih hnuah two wheeler hmangin Aizawl khawpui an fang kual.

Science Day

Lunglei College leh Serchhip College-ah nimin khan, 'Make in India: Science & Technology driven Innovation' tih thupuia hmangin National Science Day' hman a ni.

Silai tung turin ngen

Khawrihnim branch YMA chuan an khuaa silai nei zawng zawngte ko khawmin, an silaite tung vek turin an ngen. Silai tun ṭan hun atan vawiin hi ruahman a ni a, August thla thleng hun hawn a ni ang. Hei bakah hian Khawrihnim YMA chuan an khaw huam chhungah dynamo, sairawkherh etc. hman, sapel leh sava veh an khap.