ZNP hi beidawngte awmna Chi a ni lo - ZNP President

ZNP president Lalduhoma chuan, ZNP chu Zoram politics-ah Pathian ram a thlen hma chuan an kal zel dawn tih sawiin, "ZNP hi mi beidawng te, dawizepte leh mahni hmasialte awmna chi a ni lo," a ti.

Nimina ZNP party pisaa inkhawm-ah thu sawiin, Lalduh-oma chuan, “ZNP member dik takte hi chuan mi in sak saa inthlahrung taka lâwi luh a, a neitute mitmei vêng reng renga awm ai chuan, keimahni sak ngei in chhe zawka chên kan thlang zawk," a ti a; khaidiat awrh chunga uipa thau tak nih ai chuan ramhnuaia zalen taka chinghne chêr fet fawt nih a ropui zawk niin a sawi.

ZNP vice president K Lian-tlinga leh a thurualpuite'n ZNP an chhuahsan chungchangah Duhoma chuan, "Kum 2013 general election dawn ata tawh kan rilru tihah ru ṭhintu kha, kan hlauhthawn ang ngeiin a takin a lo thleng ta a ni. MLA dinhmuna hlángkaitu party leh duh taka vice president-a thlangtu party mipuite min phatsan ta mai hi hriatthiam a har," a ti a; party mite chu a lunghnûr zawnga ngaihtuahna hmang turin a chah.

ZNP President chuan, chung lamin 'Ka thlarau zawkin le' a tih hun nghaktute an nih thu sawiin, indona an hmachhawnah kuta tui thála liakte chauhin hma an hruai tawh dawn tih a sawi a, "Ṭhing-
ṭhia tui dâwtte an tel ve zel a rem tawh lo. Hlau leh khûr apiangte chu kîr leh se la, a báng tur chu báng vek law law rawh se. Zoram politics-a Pathian ram a thlen hma chuan kan kal zel dawn, a ngamin min zui se la, a ngam lo chu kîr leh rawh se,” a ti.

Tuichawngchhuah Primary School hâl chungchangah Lalduhoma chuan, “Foreigner hlang hlakin dan kalha khua an dinnaah sorkarin sikul a pe hi a mak a, hei hian a tihuangtau tih loh theih a ni lo," a ti a; MSU-te hmalakna an thlâwp tlat thu a sawi.