Taxi neitu leh khalhtute'n kawng zawh

Zoram Taxi Owners Association leh Zoram Taxi Drivers Association chuan vawiin aṭanga taxi intlân chhâwk, chhiah tihsan, All Mizoram Permit tihtawp leh taxi repalcement tihtawp duh loh lantir nan nimin khan Aizawlah kawng an zawh.

Kawngzawh hi Vanapa Hall aṭangin an ṭan a, Chanmari kawn thleng an zawh. Kawngzawh ṭannaah ZTOA President-in an kawngzawh chhan sawi a, Chanmari kâwnah ZTDA President-in thu a sawi thung. Kawng zawh tawpnaah resolution an pass bawk.

Kawng zawhtute hi mi 5,000 vela ngaih an ni a, sorkar hnena an thil ngiat pali hmangin an aurual a ni. Taxi neitu leh khalhtute hian Mizoram chhung hmun hrang hranga tlân theihna an neih ṭhin, 'All Mizoram Plying Permit' tihtawp an duh loh thu te, taxi a chhiat tawha a thara thlak theih lohna dan an duh loh thu te, life time tax pek an duh loh thu leh intlân chhâwk an duh loh thutein an aurual a ni.

ZTOA leh ZTDA Resolution

• Mizoram sorkarin replacement a titawp hi ṭha kan ti lo. Public transport vehicle-te hi fit ṭha taka a awm reng theih nan, kum tling tawhte chu replacement tih min phalsak leh rawh se.

• All Mizoram plying permit tihtawp hian taxi leh mipuite harsatna nasa tak a siam avangin, a hma ang khan kalpui leh nghal rawh se.

• Tax chi hrang hrang tihpun a nih laia kum 15 atana lifetime tax pek hi kan tlin loh avangin sût leh nghal ni rawh se.

• Duh hun huna taxi intlân chhâwktir ngawt zel hi ṭha lo kan tiin inhmusit thlak kan ti. Intlan chhawk tura ruahmanna hi sût leh nghal ni rawh se.

• A chunga kan sawite hi sorkarin a rang thei ang bera min ngaihtuahsak a, min tihhlawhtlinsak nghal kan phût a ni.