Thingsai NGO-in An lungawi loh chhan an sawifiah

Thingsai Joint NGO Coordination Committtee chuan thuchhuah siamin, an khuaa sorkar high school-a science zirtirtu leh middle school pahniha heamaster an neih loh vanga lungawi lohna an lantir chungchang an sawifiah a; an harsatna chu chinfelsak thuai turin sorkar an ngen nawn.

Thingsai Joint NGO-te tarlan danin, Thingsai M/S chu kum 1948-a din niin, Thingsai H/S chu kum 1957-a din a ni a; an khuaa M/S pahnihah hun rei tak heamaster nghet an awm tawh loh avangin harsatna a awm fo a ni. August 2015 khan H/S-a science zirtirtu MC Lalhriatpuia a thi a, chumi hnuah science zirtirtu an la nei lo.

Sorkara an ngenna hrang hrangte leh School Education minister H Rohluna'n a insawi anga hma a lak loh avangtein February 17-19, 2016 chhung Thingsaia sikul zawn zawng an khâr a; sikul khâr chhunga thu lawmawm an hriat loh avangin February 22, 2016 aṭangin chaw an nghei leh a ni.

Thingsai NGO-te chuan, chaw nghei avang hian tun thlengin mi 13 chu drip khaisak an ni tawh niin an sawi a, "Khawpuia sikul eng emaw zatin zirtirtu B.Sc degree nei pathum laite an kawl fur lai a, thingtlang lamin sikul khâr leh chaw ngheia sorkar kan nawr chung pawha min la ngawihsan char char thei hi a rilru natthlak kan ti hle a ni," an ti.