MPC-in Chakmate humhalhah Mizoram sorkar an puh

MPC party office bearer te, executive vice president Dr Kenneth Chawngliana hoa nimina an party pisaa ṭhukhawm chuan resolution pass in, Mizoram sorkar chu dan loa Chakma, Tui-chawngchhuaha awmte humhalh tlatah an puh.

MPC chuan, Bang-ladesh aṭanga Mizo-rama Chakma lut ru, Tuichawngchhuaha chhungkaw 40 chuang inbéngbelte chu dan loa awm an ni tih hre reng chunga primary school dinsak a, NLUP ṭanpuina pe leh humhalh tlatah sorkar an puh a, "Mizo mipui hmaa hmai phih nan leh tih tak takna awm si lo a, a mawihnái ngaihtuahna vang chauha khua chhuahsan tura order a siam leh site hian Congress sorkarin Chakmate vote bank atana a duhzia leh administration-ah a mumal lohzia a tilang chiang hle," an ti.

Mizoram Chakma Alliance Against Dis-crimination (MCAAD), New Delhi invuahte chu MSU-te hmalakna a chhuanchhe zawnga thuchhuah siamah puhin MPC chuan, "Media hrang hranga an thehdarhna hian Chakmate'n Mizote min tham lohzia leh min chona an tih lannaah kan ngai," an ti a; MCAAD thil tih dan chu hriatthiam harsa an tih thu an sawi.

MPC chuan, Brig. TSailo kaihhruai sorkarin Aizawl khawpui zauhna tur a duanchhuah leh thui tak kalpui tawh chu Congress sorkar leh MNF sorkarin an bawhzui loh avangin Aizawl khawpui a chêp niin an sawi a; ni tin eichawp zawnga taxi-a inhlawhfate khawpui tâwt chhuanlama hmanga intlân chhâwk tura tih an ni chu an duh loh thu sawiin, "Taxi-te chauh ni loin, motor nei zawng zawngte intlan chhâwkna siam zawk ni se," an ti.