Police-in an man MSU hruaitute hmuak

Mizo Students' Union (MSU) chuan, nimin khan Vanapa Hall kawtah Tuichawngchhuah Primary School hâltua puha Mizoram police-te'n MSU hruaitu an man mi panga, jail aṭanga chhuakte hmuakin chawimawina hun an hmang.

Man zinga tel ve MSU president PC Lalrinhlua chuan, police-te thil tih dan chu a dem thu sawiin, "Finfiahna nei miah loa Mizoram police-in min man hi hriatthiam harsa kan ti a, lock-up-a indah hmasak chu sawi loh, jail-a min khung nghal a, case rip tak tak pathum min charge nghal mai hi kan rilru a na tak zet a ni," a ti.

MSU President chuan, "Zirlai pawl kan ni a, zirna-in kan ngai pawimawh. Saw laia sikul va hâl tura va kal vang vang turah min ngai lo ula ka duh. Hâl tura kal ni ila, vawiinah hian Tuichawngchhuah saw meivâpah a chang tawh ang," a ti a; sorkarin Chak-ma khua Tuichawngchhuahah sikul ṭha tak a pek laiin, Mizo khua Damdep-II, chhungkaw 100 vel awmnaah sorkarin sikul in ṭha a pe thei lo niin a sawi.

MZP vice president B Van-lal-tana pawhin thu sawiin, "Chakma issue hi tun hma aṭang tawhin hma kan lo lak tawhna a ni a, tunah hian dan loa Chakma khaw din 28 a awm mek a, hma kan la zel dawn a ni," a ti.

Police-in MSU hruaitu an mante hi president PC Lalrin-hlua, information secretary B Lalkhawngaihzuala, establish-ment secretary John A Lalnghak-zuala, games & sports secretary J Lalmuanzuala leh executive committee member RB Lal-malsawma te an ni.