Mizoram sorkarin Zokhawsangah a tih tur a ti zo vek tawh - Home Secretary
Home secretary H Lalengmawia chuan, Zokhawsanga Assam Rifles hmun tharah Mizoram sorkarin a tih tur a ti zo vek tawh niin a sawi a, Aizawl aṭanga AR insawn dan turah Ministry of Home Affairs (MHA) kaihhruaiin Mizoram leh AR hotute Delhi-a inbiak an rawt thu a sawi bawk.
Home Secretary hian nimin khan a pisaah thuthar thehdarhtu ṭhenkhatte a kâwm a; Zokhawsanga AR hmunah Mizoram sorkarin a tih tur a tih zawh vek tawh thu sawiin, "Saw saw an ram a ni a, in hrang hrang, kawlphetha leh tui a awm tawh chuan a hnua maintain (enkawl zui) chu kha laia a ram neitu, a mi chêngate mawh a ni," a ti.
AR hmun thar chu kum 10 hma lama peih vek tawh a nih avang leh enkawl mumal loha hun eng emaw chen a awm avangin thil tlabal a awm nual tawh thu sawiin H Lalengmawia chuan, "An luah hnuah AR lamin an hmunhmate an maintain tur a ni," a ti a, an enkawl ṭhat loh avangin chhuanlamah Mizoram sorkar an puh ṭhin niin a sawi.
Home Secretary chuan, Aizawl aṭanga Zokhawsanga AR insawn dan tura ruahmanna, memorandum of understanding (MoU) duanah AR leh state sorkar ngaihdan inang lo tam tak a awm thu leh, MoU chu MHA hotute kaihhruaina hnuaiah Mizoram sorkar leh AR hotu aiawhte'n sawiho an rawt thu a sawi a; Zokhawsangah boundary demarcation tih a nih tawh thu leh Lammual sira Laldenga Cultural Centre sak nan no objection certificate an neih tawh thu a sawi bawk.
H Lalengmawia chuan, Zokhawsanga AR ho hnena tui pek zat turah inremna a awm lo tih sawiin, urban water supply norms, ni khatah litre 135 (per capita per day) anga kalpui tur a nih thu a sawi a, "Litre 4,00,000 hi ni khat atan ni loin, chawlhkar khat chhunga pek ṭhin a ni... Tuna sipai awm zat en hian, PHE tui pek hi an khamkhawp. Zokhawsanga an insawn chhuah tak tak hunah chuan an mamawh zat ang zelin PHE hian an pe ang tih AR pawh hriattir an ni," a ti.
Electric transformer chungchangah Home Secretary chuan, Zokhawsang AR hmuna transformer-te chu PE department leh EPIL ten an bun a nih thu sawiin, "MHA-in kum 2011-12 inkara cheng nuai 91.17 a pek hnua siamṭhat a ni tih hi EPIL chan niin, state sorkar a inrawlh lo," a ti a; Zokhawsang chawmtu 33/11kV sub-station, Mualpuia mi chuJERC dan angin Zokhawsangah sawn theih a nih loh thu a sawi.
AR luah ram chhunga ram pass awm chungchangah Home Secretary chuan, Aizawl bika pass neite chu insawifiah tura tih vek an nih angin chhanna an thehluh tawh hlawm thu a sawi a, "House pass pasarih leh LSC panga neitute'n an pass-te sorkarah an surrender (pe let) a, sorkarin July 7, 2023 khan cancellation order a chhuah," a ti a; Aizawl khawpui chhung leh Chite Firing Range huam chhunga ram pass awm kaihhnawihah Gauhati High Court-ah thubuai a awm mek thu a sawi bawk.
Aizawl aṭanga Zokhawsanga insawn leh a kaihhnawih thila AR-in memorandum of understanding an duan chu Home department-in Chief Minister hoin an en tawh tih sawiin H Lalengmawia chuan, "September 8, 2023 khan MHA-ah comment thawn a ni," a ti.
Zokhawsang leh a chhehvela lo/huan/quarry neite feh kawng chungchangah Home Secy chuan, kum 2020-ah by-pass road siam a nih thu leh sum sen chu MHA-in Mizoram PWD-ah a la rulh loh avangin blacktop theih a la nih loh thu a tarlang a, "AR-te an insawn thuai theih nan state sorkar chuan a sum séngin blacktop/RCC turin kum 2023-ah hma a la thar leh a, contractor a thlang tawh," a ti a, ruahtui hul veleh thawh tura ruahman a nih thu a sawi.
H Lalengmawia chuan, Zokhawsang kawng thawm ṭha turin MHA-in Mizoram sorkar a la rawn hriattir ngai loh thu sawiin, "Kum 2020-a MHA-in AR insawn tura a rawn tih hnu khan Zokhawsang panna kawng chu state sorkar sum vbc. 11.15 chuang séngin state sorkarin a siamṭhatsak a, hei hi tun thlengin sorkar laipuiin Mizoram sorkar a la reimburse (rùl) lo," a ti.
Home Secretary sawi danin, Zokhawsang panna kawng km. 4.140 chu a zau zawng chawhrual metre 5.95 a ni a, BRO-in kum 2004-a an siam a ni. Metre 7.32-a zau ni tura zauh an duh thu AR-in MoU-ah an tarlang a, chu chu state highway standard 7.45 a tling lo hret. PWD-in an chhût dan chuan, kawng chu zauh dawn ta se, Rs 8,26,11,000 sèn a ngai dawn. AR duh dan anga zauh turin Mizoram sorkarin sum a neih loh avangin MHA kaltlanga Mizoram PWD thawhtir tur emaw, BRO/agency dang thawhtir turin Home department-in MHA-ah an thlen a ni.