Central YMA president thar Lalhmachhuana

YMA Inkhawmpui Lian vawi 74-na, Biate khuaa neih chu nimin khan chhunzawm leh a ni a, nizan khan a ṭiak. Kum 2023-2025 chhunga Central YMA president atan Lalhmachhuana, vice president ni lai thlan a ni.

YMA Inkhawmpui Lianah hian Nilaini zan khan vantlang inkhawmah YMA hruaitu hlun mi eng emaw zat hnenah chawimawina hlan a ni a, nimin khan palaite'n kum 2023-2025 chhunga CYMA office bearer turte an thlang a ni. Nizan khan pandal, Zialung Rûnah vantlang inkhawm hnuhnung ber neih a nih leh hnuah inkhawmpui a ṭiak a; vawiin hian palaite'n an hmun an pan ang.

YMA Inkhawmpui Lian vawi 74-na hi a tirah chuan Churachandpur, Manipur-a nghah tura rel a ni a, mahse, eng eng emaw avanga an thleng thei dawn lo tih tihchian a nih hnuah CYMA hruaitute leh Biate Branch hruaitute indàwrin, Biate khuaa nghah turin sawn a ni.

Inkhawmpui neihna atan hian Biate khelmualah Zialung Rûn sak a ni a, a dung ft. 135 leh a vâng ft. 120-a zau niin, mi 4,000-4,500 inkar ṭhut lenna a ni.