Covid chhuanlama sum pûk zelah ZPM-in Mizoram sorkar an puh

ZPM Political Affairs Committee (PAC) member TBC Lalvenchhunga chuan nimin khan Aizawl Press Club-ah thuthar thehdarhtute a kâwm a; state dangin Covid-19 an chhuanlam tawh loh laiin, MNF kaihhruai Mizoram sorkar chu Covid-19 chhuanlama sum pûk zelah a puh.

TBC Lalvenchhunga chuan, Covid vanga harsatna a awm laiin Kamrul-a bill a táng lo a, Abu Mazumdar-a buhfai supply to bik bill pawh a táng ngai lo niin a sawi a, "Mipui healthcare bill leh SEDP pe thei lo sorkar kum 5 kan lo hrawn ta. Mipui hian Finance Minister thiam lo ber leh kai pêng thiam ber hi vote kan ba tawh lo a ni," a ti.

SASCI loan chu central grant a ni lo tih sawiin Lalvenchhunga chuan, "Covid harsatna vanga sorkar laipuiin state-te hnena loan a offer niin, state ṭhenkhat chuan leiba kan ngah sa em mai tiin an la duh lo. Loan, rulh leh tur a nih avangin income awm leh tura ruahman a ni," a ti a, Mizoramah chuan party mite induhsakna leh campaign nan an hmang niin a sawi.

ZPM PAC Member chuan, SASCI aṭangin kum thum chhungin cheng vbc. 993.19 pûk a ni tawh tih sawiin, "SASCI hi state dang la vete pawhin Covid chhuanlam a reh rualin sum pûk belh zel tawh loin, mahnia intuamhlâwm an tum laiin, Mizoram sorkar chuan a theih chhung pûk a tum," a ti.

TBC Lalvenchhunga chuan, SASCI sum pûk hmanga hmasawnna ruhrel din loin, party induhsakna atan bakah, CM meuhin bial vil nana an hman thu a sawi chhuak tih sawiin, "Mipui zah lohna nasa tak a tling. Budget indaih lohna vanga sum pûk tur pangngai piah lam, leiba pawha ziah lan tel loh heti zat an pûk dan sawifiah duh si loin, mipui hmaah covid vanga harsatna an sawi fo hi chhuanlam a tling lo," a ti a, mipui bum tumna a nih thu a sawi.

Mizoram sorkarin Covid vanga sum dawn kim loh vbc. 2,636.52 a nei anga an sawi ṭhin thu sawiin TBC-a chuan, "Kum 2019-20 aṭanga 2022-23 thlenga kan budget hmuh tur beisei aia tam kan hmuh belh hi vbc. 2,563.17 a ni. Covid chhuanlama kan sum hmuh loh an sawi ziah vbc. 2,636.52 leh kan dawn belh zat inthlauhna hi vbc. 73.35 chiah a ni," a ti.

TBC Lalvenchhunga chuan, ZONET Cable TV-in ZPM leader Lalduhoma an kawmnaah, Mizoram economy ṭhanna (growth rate) -9.01% a nih thu a sawi chu thu dik a nih thu leh, budget document-ah chiang taka tarlan a nih thu a sawi bawk.