Sawhthing lei tak tak tum loah MNF Media-in ZPM party an puh
MNF Media & Publicity department chuan nimin khan Aizawl Press Club-ah press conference an nei a, ZPM chu sorkarna pawh chang se, sawhthing lei tak tak tum loah an puh.
MNF Media general secretary VL Krosshnehzova chuan, ZPM chief ministerial candidate Lalduhoma'n, 'ZPM a sorkar chuan kum 3 chhung sawhthing kan lei phawt ang' tia a sawi tawh thu sawiin, "Vawi tam tak sawhthing lei an tum thu hi an lo sawi tawh. Kut hnathawktute lung tileng thei tur ang berin an sawi ṭhin," a ti.
VL Krosshnehzova sawi danin, ZPM Market Study Team convener Dr KC Lalmalsawmzauva'n ZONET-in an kawmnaah sawhthing hralhna an hmuh zawh loh thu a sawi niin a sawi a; sawhthing hralhna tur an zawn hlawhchham avangin an beidawng a, Lalduhoma'n, 'Sorkar tak takin lei kan tum lem lo' tiin ZONET-in an kawmnaah a sawi leh ta niin a sawi a ni.
MNF Media hotute chuan, ZPM chu an tlin hma aṭangin an thusawi an thlak leh ṭan nia sawiin, "Sorkar ngat se chuan an intiamna ang an nih loh nasat turzia hei hian a tarlang chiang hle. An thusawi sût leh zung zung duh party leh leader hi enchhin tlak an ni lo," an ti.
MNF Media hian MNF chu SEDP hnuaia cheng nuai 3 hmanga kut hnathawktute khaichhuah tumtu an nih thu sawiin, inthlan awm turah thlang tling leh ngei turin mipui an ngen a ni.