MNF vote lo turin mipui ngen

North East Congress Coordination Committee (NECCC) chairman Nabam Tuki, Arunachal Pradesh MLA ni lai leh CM hlui leh, NECCC convener Pardyut Bordoloi, Assam Lok Sabha MP-te chuan Mizoram inthlanpui awm turah MNF party vote lo turin Mizo mipui an ngen.

NECCC hruaitute hian nimin khan Aizawl Press Club-ah thuthar thehdarhtute an kâwm a; BJP-in India ram mipui ṭhen darh an tum nia sawiin, "Tharum thawhna leh inhuatna an thlentir mek. Sakhaw tlem zawk leh hnam hnuaihnung zawkte an sakhua leh an ṭawng tihbosak an tum a, chumi atan chuan hma an la a ni," an ti.

Hmarchhak state hrang hrangah tualṭo party hmangin kua an hreuh nia sawiin NECCC hruaitute chuan, "A chhan chu anmahni tawpa an rawn luh chuan hmarchhak mipuite'n an pawm dawn lo tih an hriat chian vang a ni," an ti a; BJP chu regional party hmathehin, an hnungah an biru niin an sawi.

NECCC hruaitute chuan, Mizoramah chuan BJP-in MNF an thawhpui tih sawiin, "Hei vang hian Manipur buainaah pawh Mizoram Lok Sabha MP chu Parliament-ah a ngawi tlat. MNF hi BJP-in an thunun tlat a ni. BJP thil tum ṭha lo tak a hlawhtlin theihna atana puitu MNF hnâwl a ngai," an ti.

Congress party sorkarnaah hmasawnna a thleng ṭhin nia sawiin, "Tunah pawh Congress in thlan tlin chuan Ṭang Puihna hmangin miretheite dâwm kân an ni dawn a, ṭhalaite chawi san an ni ang," an ti a, Congress chu Mizoram mipui tan an din reng dawn thu an sawi.

NECCC hruaitute chuan, central-a Congress sorkar laiin hmarchhak state-te'n ngaihsak an hlawh nia sawiin, "Hmarchhakte'n hma kan sâwn theihna atan NEC leh DoNER din a ni. BJP chuan hmarchhak hi eng atan mah min ngai lo," an ti a, Manipur buaina pawh chingfel duh loah BJP sorkar an puh a ni.