Damlo kanna atana Rs 2,50,000 Duhoma'n a pek dan sawifiah

ZPM, Serchhip Block chuan thu­chhuah siamin, Zoremsangi w/o Zoramsiama, Serchhip Dinthar hnenah bialtu MLA Lalduhoma'n damlo kanna Rs 2,50,000 a pek ngei thu leh, finfiah theih a nih thu an tarlang.

Serchhip block ZPM chuan, Lalduhoma'n a MLA fund hmanga Zorem-sangi damlo a kanna Rs 2,50,000 anga ziah a nih laiin, Rs 1,000 chauh a pe anga MNF general secretary VL Krosshnehzova'n October 25, 2023-a chanchinbumite a kawmnaah a sawi chu a dik loh thu leh pawi an tih thu an tarlang a ni.

Serchhip ZPM chuan, "MLA fund hmanga Pi Zoremi damlo kanna hi September 5, 2022 khan a pasal Pu Zoramsiama MRB account-ah a lut thlap a, finfiah theih reng a ni," an ti a; Zoramsiama te chu ZPM mi leh sa an nih avangin MLA fund hmanga damlo kanna an dawn chu sawi darh an hreh a, inthîk theih a nih avangin an zêp ṭhin nia sawiin, "Party inchirhthehna hmanruaa hmanga an ṭhiante leh laina anga an ngaihte'n thu belhchian dâwl loa mi vanduaina hmanga an timualpho hi pawi kan ti hle a ni," an ti.

ZPM, Serchhip Block chuan, MLA fund hmanga damlo kanna (for health purpose) pek tur chu MLA-in DC-ah a thawn ṭhin a, DC-in damlo bank account-ah a thun mai ṭhin a, damloin account a neih loh chuan a chhungte bank account-ah thun ṭhin a nih thu an tarlang bawk.