Kum 2016-17 AMC budget atan Cheng vbc. 31.01 pharh a ni

Aizawl Municipal Corporation (AMC) Board of Councillor (BoC) chu nimin khan an ṭhukhawm a, kum 2016-2017 atana AMC budget tura ruahman vbc. 31.01 pharh a ni.

BoC meeting hi AMC mayor PC Lal-hmingthanga'n kaihruaiin, dy. mayor Lalringliana'n budget atana ruahman hi a pharh a, he mi hnu hian meeting tihtawp nghal a ni. Budget hi vawiinah sawihoa passed tum a ni ang.

Budget tura ruahmanah hian cheng vbc. 18.17 chu AMC-in kawng hrang hranga a hmuh ve tura tih a ni a, vbc. 12.94 chu sorkar laipui leh state sorkar aṭanga a hmuh tura tih a ni thung.

Sum hmanna tura ruahman a nih dan chuan vbc. 16.57 chu AMC inrelbawlna leh thawktute hlawh tur a ni a, vbc. 14.44 chu hmasawnna hnathawhna tur a ni.

Budget pharhtu dy. mayor Lalringliana chuan pawisa an neih ang ang chu daihzai thei ang bera hman an tum tih sawiin, "Hnathawh reng reng pawh mittlung tak leh ṭangkai thei ang bera kalpui kan tum. Mipui thlawpna pawh kan beisei a ni," a ti.

Lalringliana chuan, Aizawl mipui hmasawnna tura ṭan lakna tur pawimawh ber pakhat chu mipui tana ṭangkaia hman tur sum hmuhna atana mipui phur tirit lutuk si loa, chhiah hrang hrang lakkhawm a nih thu a sawi.

AMC-in property tax bakah chhiah dang hrang hrang a lak mek thu sawiin Dy. Mayor chuan, "Property tax hi ruahmanna fel zawk nena khawn leh tum a ni. Local council-te kut kea hman kan tum a, an hah man pawh lawmman siamsak kan tum," a ti a, mipuite chu phur taka chhiah pe turin a ngen.

Lalringliana sawi danin, property tax aṭanga pawisa hmuh 80% chu mipuite tana hmasawnna hnathawh nan hman tur a ni a, 20% chu hnathawktu leh local council-te lawmman atan hman tum a ni.

AMC innghahna ber chu Finance Commission aṭanga sum hmuh a ni a, hei hi water supply, bawlhhlawh buaipuina, sewage, solid waste management, storm water drainage, vantlang tana rotling siam, kawng enkawl, foot path siam, street light leh inphumna leh thil dang atana hman tur a ni.

Dy. Mayor chuan Finance Commission aṭanga sum hmuh chu sorkar laipuiin guidelines a siam ang zela hman tur a nih thu sawiin, "Sum hmante pawh uluk zawka kalpui tum a ni," a ti a, account pawh ṭha taka an vawn tur thu a sawi.