Mizoram dinchhuahna tur Policy kan duang mek - Mizoram BJP

BJP, Mizoram Pradesh hruaitute chuan nimin khan Aizawl Press Club-ah thuthar thehdarhtute kawmin, sorkarna an chan huna Mizoram dinchhuahna tur policy an duan mek thu an sawi.

BJP president Dr. JV Hluna chuan policy an duan mek chu prime minister Narendra Modi pawhin nghakhlel takin a thlir tih sawiin, "Kan policy duan mek hi Mi-zoram retheihna bawih aṭanga khaichhuahna tur a ni," a ti.

March thla aṭanga Food Security Act kalpui a ni tur chu lawmawm an tih thu sawiin Dr. JV Hluna chuan, he hamṭhatna dawng turte hi party inthliarna awm loin fim taka thlan a ni ngei em tih Mizoram mipuite hrilhhre turin sorkar an phut thu a sawi.

BJP hruaitute chuan Chief Minister-in DPR siam kawnga thawk chak loah sorkar hnathawkte a puh nia sawiin, "CM hian sorkar hnathawkte a hmuhsitzia leh mahni mawnghlimna mai a ni tih inhmuchhuak se kan duh," an ti.

BJP hruaitute sawi danin, an party con-stitution leh India con-stitution zul zuiin India rama eng political party mahin sakhua leh hnam thliar hran a rem ti lo angin, BJP chuan eng hnam leh sakhua mah thliar hran a nei lo.

National Democratic Alliance chungchang sawifiahin BJP hruaitute chuan, "Tunhma chuan MNF party hi NDA-ah a telve ṭhin a, tunah chuan amah leh amah a inhnuhdawh avangin an tel tawh lo," an ti.