Kawnpuia in kangah mi 1 kang hlum

Thawhlehni zan dar 10:30 vel khan Kawn-pui Hmarvenga RL Vanlalhruaia chenna in Assam type chu bungraw chuh hman lohin a kang a, in neitu RL Vanlalhruaia (39) a kang hlum.

RL Vanlalhruaia hi a unaupa Laldela nen chauha cheng an ni a, a unaupa hi a zinbo lai a ni. In kan chhan hi hriat a ni lo.

RL Vanlalhruaia ruang hi a unaupa Lalrinmawia te inah lak niin, nimin khan vui a ni. In a kang tih an ṭhenawmten an hriat chuan in chhung a kang nasa tawh hle a, a bul hnaia inte erawh a kan kai lohna atan an venghim thei a ni.

Kangmei ṭhelh a nih lai hian mipuiten in chhungah mihring an awm tih an hre lo a; ṭhelh mih a nih hnuah kang vap leh thil dang an seng hawi laiin ruang hi an hmu chauh a ni.

Bialtu MLA Hming-dailova chuan kangmei tuarte hi rangva bundle li a pe a, Kolasib DC H Lalengmawia pawhin kang mei tuarte chhawm-dawlna atan cheng nuai khat a pe.

Ruang a awm avangin in kanna hmunhma hi senghawi a la ni loa, vawiinah V/C leh YMA te kaihhruaina hnuaiah senghawi a ni anga, in thar sak dan tur pawh ruahman nghal tum a ni.