Food Security hman ṭan a ni

National Food Security Act (FSA), 2013 chu March 1 aṭang khan Mizoram pumah hman a nih avangin FSA-in a huamte chuan tun thla aṭangin buhfai kg. khat Rs. 3 in an lei tawh dawn.

Food Civil Supply & Consumer Affairs (FCS&CA) hotute hnen aṭanga thudawn danin, tun thla aṭang hian retailer-te hnen aṭangin AAY chhungkuain thlakhatah buhfai kg. 35, kg. khat Rs. 3 in an lei thei dawn a, priority household chuan mi pakhatin thla khatah buhfai kg. 5 Rs. 3 zelin an lei thei thung ang.

Priority household-te hian an duh chuan retailer hnen aṭangin buhfai man tlawma an lei bak hi kg. thum dang an lei belh thei dawn a, mahse hei hi chu kg. 1 Rs. 15 in an lei a ngai dawn a ni.

AAY hnuaiah hian chhungkua 25,785 ah mihring 83,052 an awm a, priority household chu chhungkaw 1,11,088 niin, mihring zat chu 5,61,830 an ni.

Aizawl East, Aizawl West, Champhai, Kolasib, Lawngtlai, Lunglei, Mamit, Saiha leh Serchhip-a District Civil Supply Office chuan ration card an siam mek a, AAY tan a rawng eng, household priority tan a rawng hring leh FSA in a huam ve lohte tan a rawng var siam a ni.

Mizorama ration card awm tur zawng zawng chu 2,44,511 a ni. Ration card siam turte chu AAY tan 25,785, household priority tan 1,11,088 leh FSA-in a huam ve lohte tan 1,07,638 a ni.

FSA-in a huam tur mi 6,44,882 (AAY 83,052 leh household priority 1,11,088) hi kum 2011 chhiarpuia Mizorama mihring awm zat aṭanga chhutin thingtlangah 81.88% leh khawpuiah 48.60% a ni.