KHAWTHLIR

Kut discount

Mizoram Merchant Association (MIMA) chuan thuchhuah siamin, Chapchar Kut niah 'Chapchar Kut Special Discount Pui' neih an rel thu tarlangin, nidanga discount an pek aia sanga an thil zawrhte discount ṭheuh turin sumdawng zawng zawng an ngen.

MZU-ah workshop

Mizoram University chuan, Indira Gandhi National Centre for the Arts leh The Energy and Resources Institute nen
ṭangkawpin nimin khan “Sustainable Management of Indigenous Knowledge, A North East Perspective' tih thupuia hmangin MZU ah workshop an buatsaih a, hnam zia leh thiamnate vawn nun leh chhawm nun zel dan tur an zirho.

Painting Exhibition

Lalzuitluangi, Hnahthial, Electric Vengin First Charity Solo Painting Exhibition Electric YMA Run-a a buatsaih chu nimin khan Lunglei Times editor H Lalthansanga'n a hawng. Exhibition-a sum hmuh chhuahte chu People Living with HIV te hnenah hlan a ni ang.

Kawng dang dawn

PWD, Reiek leh Ailawng khawtlang hruaitute chuan thuchhuah siamin, Aizawl-Reiek kawng black topping hna thawh a nih dawn avangin vawiin
aṭang hian zing dar 9
aṭanga tlai dar 3 thleng, thu leh awm hma chuan kawng dan a nih dawn thu an tarlang. Thuchhuah hian emergency thil a huam lo ang.

Science seminar

Mizoram Science, Technology & Innovation Council (MISTIC), Directorate of Science & Technology leh Government Kolasib College
ṭangkawp chuan nimin khan Kolasib College-ah National Science Day pualin, science seminar an buatsaih.

Assesment camp

State Council For Education Research Training (SCERT) chuan, March 1 leh 2 khan Thingsaiah assesment camp an buatsaih a, Thingsai leh a chhehvel khuaa zirlai naupangte tan inentirna an buatsaih.

Serchhipah training

AH&Vety dept., Ser-chhip district chuan, NLUP hnuaia bawng vulh thlangtute tan nimin khan Serchhipa an dept. training hall-ah training an buatsaih. DVO Dr. Lalnghinglova chan bawng vulhtute chu thil pawimawh hrang hrang a zirtir a, he mi hnu hian bawng in sak dan tur leh Shillong aṭanga bawng lak dan tur chungchang sawiho a ni.

Chawlhbuk thlawp

Joint Action Committee on Inner Line Forest Reserve chuan thuchhuah siamin, Bairabi khaw bul Ch. Chhunga leilet hmuna MZT ten Zofate Chawlhbuk sak an tum chu ṭha an tih thu sawiin, "He in sak tur hi kan ram ngaw humhalhna leh venbuk ṭangkai tak a nih dawn avangin a tawp thlengin kan thlawp tlat dawn tih Zoram mipui hriatah kan puang e," an ti.

CM-ah ZORO lawm

ZORO chuan thuchhuah siamin, chief minister Lal Thanhawla'n Tantia Constructions Ltd.-te chu Mizoram leh Manipur inkalpawhna kawngpui Manipur state chhunga Sinzawl leh Tuivai inkar kawng chhe lutuk siam ṭhaa hna-tlangte ṭanpui a, an khawl neihte a theih ang ang han thawh ve turin a hrilh nia sawiin, CM lakah hian an lawm thu an sawi.

Hriatthiam ngen

Aizawl City Bus Owners Association (ACBOA) chuan thuchhuah siamin, March 3-7 chhunga KṬP General Conference, Champhaia neih a nih dawn avangin bus eng emawzat a kal dawn tih an sawi a, Aizawlah bus service a tlem avangin mipuite hriatthiamna an ngen.