Ramngaw leh nungcha humhalh turin Mitinin mawhphurhna kan nei - Zira

Home minister R Lalzirliana chuan, ramngaw leh nungcha humhalh kawngah mitinin mawhphurhna kan nei a ni tih kan hriat a ngaih thu a sawi.

Thawhlenia Environment & Forest dept.-in Biatea rest house an sak thar a hawnnaah thu sawiin R Lalzirliana chuan, "Ramngaw leh nungchate hi Forest department leh sorkar kutah chauh dah loin, mitin hian mawhphurhna kan nei tih kan hriat a ngai a ni," a ti.

R Lalzirliana chuan Mizo mipuiten thing leh mau, ramngaw leh a chhunga cheng nungchate humhalh nachang kan hriat loh avangin Mizo mipuiten sik leh sa inthlak leh tui hna lamah harsatna kan tawk chho ta mek tih sawiin, "Mizoram hi thlir mai chuan ngaw la ṭhat viauna hmun niin lang mah se, ramngaw dur ṭha a vang tawh hle," a ti a, India ramah pawh ramngaw dur ṭha nei ṭha lo pawl kan nih tawh thu a sawi.

Thusawitu dang Forest minister Lalrinmawia Ralte chuan, "Tun hnaia mi ṭhen-khatin China airgun, enlenna invuah hmanga nikhata sava 200 chuang an kapthla tih Facebook lamah hmuh tur a awm hi thil pawi tak a ni. Mipui hnenah inzirtirna uar zawk a kalpui a la
ṭul dawn a ni," a ti.

Lalrinmawia Ralte chuan district commissioner-te sava leh nungchate humhalhna thupek chhuahtir an ni tih sawiin, hei hian ngaih pawimawh a hlawh loh chuan dan khauh zawk leh hun rei zawk daih tur khapna thupek tihchhuah leh a nih tur thu a sawi.

Rest house hi June 2, 2016 aṭanga sak ṭan niin, a building sakna atan leh a chhung cheina atan bakah a bulhnaia lungremna atan cheng nuai 30 vel sen a ni.