Gas booking leh home delivery-ah a nihna ang taka kalpui turin hriattir

State Consumer Disputes Redressal Commission (SCDRC) chuan tun hnai khan Mizoram Consumers Union (MCU) headquarters-in thubuai an thehluhah thuremna a tichhuak a; gas booking leh home delivery kalpuiah tihkhawmuan awm miah loa a nihna tur ang taka kalpui tawh turin a hriattir.

MCU hian All Gas Distributors of Mizoram, All RGGLV Distributors of Mizoram, Indian Oil Corporation (IOC) Deputy Manager, Mizoranm state sorkar leh FCSCA Director-te lakah SCDRC-ah petition an thehlut a, SCDRC-in a ngaihtuah zui a ni.

SCDRC hian kum 2022 khan Mizoram Consumers Union aiawh leh gas distributor hrang hrang te, Indian Oil Corporation aiawh leh FCSCA department aiawhte ṭhukhawmin inremna (negotiated settlement) point panga an siam chu gas (LPG) distributor-te'n a nih angin an kalpui lo tih a tarlang.

MCU-in kum 2015 aṭangin gas pek leh sem chungchangah inkaihhruaina dan zawm a nih theih nan kawng hrang hrangin hma an la tawh tih tarlangin SCDRC chuan, "IOC hnenah pawh vawi tam tak gas distributor-te thil tih dik loh hi complaint thehluh a ni tawh a, sorkar aiawha enkawltu Food, Civil Supply & Consumer Affairs department-ah pawh zualko a ni fo tawh. Department hmalakna pawhin awmzia a nei thui hlei thei lo a ni," a ti.

SCDRC thutluknaah chuan, gas booking leh delivery kalpui danah tihkhawmuan awm miah loin a nihna tur ang taka kalpui ngei tawh tur a ni a; mobile application emaw, online booking emaw, remchang dang emaw hman tur, tih a ni.

Gas distributor-te'n connection thar an pek chhuahin consumer-te gas stove an lei luihtir tur a ni lo, tih a nih bakah, SCDRC thutlukna chu IOC nen thawk hoin gas agency-te'n an zawm ngei em tih enfiah turin nodal department - FCSCA department hriattir a ni bawk.