BJP-in SEDP chhui chiang tur din an tum; Mizoram ramri kan chingfel ang - JP Nadda
BJP national president JP Nadda chuan nimin tlai khan Hotel Regency-ah MLA inthlan lo awm tura an party manifesto a tlangzarh a, "Sorkarna kan chang a nih chuan SEDP-a eirûkna awm chhui chiang tur kan din dawn. Mizoram leh Assam ramri pawh chinfel a ni ang," a ti.
JP Nadda chuan, party ṭhenkhat manifesto chu lehkha chhia ang mai an nia sawiin, "A chhan chu an tih theih loh tur an ziak ṭeuh zel. Keini chuan kan manifesto tur hi sum dinhmunte thlirin, uluk takin kan zir chiang ṭhin. Heng hi telh ta ila engtin nge kan tih theih ang tihte uluk takin kan ngaihtuah ṭhin a ni," a ti a, an tih theih loh tur manifesto-ah an ziak ngai lo niin a sawi.
BJP sorkar hnuah hmarchhak state-ah a ṭha zawngin hmasawnna a thleng nia sawiin Nadda chuan, "Helna 80% kan tibo tawh. Tun hma chuan nunphung, sakhuana, hnam bil, adt. hmangin politics khelh a ni ṭhin. Tunah chuan sorkar hnathawh, hmasawnna, sorkar dinhmun leh thil dangte hmangin politics khelh a ni tawh. BJP hian politics khelh dan phung kan thlak danglam a ni," a ti.
JP Nadda chuan, sakhuana, hnam nun leh thil dangahte BJP-in inthliar hranna neih ṭha an tih loh thu sawiin, "BJP chuan hmarchhakah hian inṭhen darh záwng ni lo, divine policy kan kalpui a ni," a ti a, BJP sorkar hnuah India hmarchhak bialah hmasawnna nasa takin a thleng niin a sawi.
BJP National President sawi danin, prime minister Narendra Modi kaihhruaina hnuaiah India ram economy-in hma a sawn a, economy ngêlnghet a nei chho mek. Tunah chuan khawvela ram economy ṭha tehnaah pangana a ni tawh a, mithiamte chuan kum 2028-ah chuan pathumna ni turin an chhût. Kum 2028-29 ah chuan khawvel economy-ah India ramin a thawh chu 18% tling tura chhût a ni.
BJP MANIFESTO ṬHENKHAT
▶ Mizoram leh Assam inkara ramri buaina chinfel.
▶ SEDP-a eirûkna enthlithlaitu tur special investigation team din.
▶ Sorkar kal meka sum kal dik lote mipui hriat tura tihchhuah.
▶ Cheng vbc. 25 sénga Mizoram Sports Talent Development Programme siam.
▶ Sorkar sikul siamṭhatna tur cheng vbc. 125 dah.
▶ PM Kisan hnuaiah loneitute ṭanpuina Rs 8,000-ah tihsan.
▶ Ruihhlo tirêm tura beihpui thlak.
▶ Regional Institute of Medical Science ni tura Zoram Medical College hlàn kai.
▶ Hmeichhiate tan sorkar hna 33% hauh.
▶ Zirlaite hnenah Rs 10,00,000 thleng short term free loan pek.
▶ Kut hnathawktu pawl nei lote hnena short term loan Rs 1,00,000 pek.
▶ Chhungkaw tin tana sorkar hna leh mimal hna hmuh theihna siam.