Article 370 paihtu BJP sorkar hian 371(G) an paih hreh lo ang - Jairam

All India Congress Committee (AICC) general secretary Jairam Ramesh, Rajya Sabha MP ni mek leh union minister hlui chuan, BJP sorkarin Indian Constitution-a Mizote himna tura dah Article 371(G) an paih hreh ring lo turin Mizo mipui a chah a, SEDP chu State Empty Development Promises tihna a nih thu a sawi.

Jairam Ramesh hian nimin khan Aijal Club-ah thuthar thehdarhtute kâwmin, BJP sorkarin Jammu & Kashmir himna Article 370 an paih thu a sawi a, "India sorkar leh MNF inremna vanga Indian Constitution-a dah, in himna leh in inhungna Article 371(G) hi BJP sorkar hian a paih hreh ring suh u. 371G hi Mizote hung bikna an ni a, state assembly pawmpuina lo chuan in tihphung, customary law, adt. tihdanglam theih a ni lo," a ti.

MNF leh ZPM chu BJP-in an thunun nia sawiin Ramesh chuan, "MNF President hian BJP thuhnuaiah kan awm lo ti ṭhin mah se, thil thlen dan aṭangin an awm tih chiang takin a lang," a ti a; Manipur buaina chungchanga Mizoram MP-te Parliament-ah thu an sawi phal loa, an microphone tihtawp a nih pawhin MNF President-in BJP a sawisel ngam lo niin a sawi a; ZPM chu programme leh ideology nei loah a puh.

Jairam Ramesh chuan, November 7, 2023-a MLA inthlan tur chu Mizoram history danglam dâwrh theihna tura pawimawh a nia sawiin, "BJP hian thil tum an nei a, chu chu India rama sakhaw hrang hrang, nunphung leh ṭawng hrang hrangte tihbo a, ṭawng khat, nunphung khat leh sakhaw khata awmtir a ni," a ti.

Manipur-ah BJP-in sorkarna an chan aṭanga rei lo têah buaina a chhuak tih sawiin Ramesh chuan, "Buaina a chhuah aṭanga ni 179 hnuah pawh Prime Minister-in Manipur a la tlawh lo a, Manipur CM, Manipur aṭanga Union Minister of State, MLA leh political party-te pawh a hmu duh lo," a ti a, BJP-in an thil tum a hlawhtlin theih nan mipuiah inhuatna rilru an tuh niin a sawi.

Jairam Ramesh chuan, MNF kaihhruai sorkar a hlawchham hle nia sawiin, "SEDP hi State Empty Development Promises tihna a ni. Sorkarna kan chana kan tihhlawhtlin tur tam tak kan puang tawh. Damlote cheng nuai 15 thleng a thlawna an inenkawl theihna kan siam dawn a, gas bûr khat Rs 750-in kan pe dawn," a ti.

AICC General Secretary chuan, Congress party chu Mizo sakhua, ṭawng leh nunphung humhim thei awm chhun nia sawiin, "MNF leh ZPM chu BJP thuhnuaia awm tur an nih avangin an tan tih ngaihna a awm lo," a ti a; Congress candidate-te vote tling ngei turin Mizo mipui a sáwm a ni.