Sorkar sum khawih chingpentu Court-in thiam loh a chantir

Law & Judicial depart-ment-a LDC (muster roll) ṭhin Lydia Lalhruaitluangi, Ramhlun North chu sorkar sum Rs 1,06,90,916 tihchingpen thubuaiah Special Court (PC Act)-in nimin khan thiam loh a chantir a, hremna tur chu October 30, 2023-ah puan a ni ang.

Court thuremnaa tarlan danin, Law & Judicial depart-ment sum tihchingpen a awm nia hriain under secretary Lalhlimpuii Hmar chuan kum 2018 khan Anti Corruption Bureau (ACB)-ah FIR a thehlut a, ACB-in an chhui zui a ni.

ACB-in an chhuinaah, Lydia Lalhruaitluangi hian Law & Judicial-a a thawh lai, December 2015 aṭanga August 2018 chhungin department sum tam tham tak office bill lem, sanction order lem, a chunga thuneitute signature lem leh cash memo lemte a khawih chingpen a, a nu leh pa bakah a laizáwn bank account-ah Rs 1,06,90,916 a thun a, a mimal hlâwkna atan a hmang tih hmuh chhuah a ni.

Lydia Lalhruaitluangi'n sum a tihchingpen zinga a tam ber chu sorkar ukilte hlawh tur, Professional Services tih hnuaia mi a ni a, a chhungte bank account-ah sum a thun avangin account neitu a pa Lalhnehliana, a nu Zothansangi leh a laizáwn Lalhlimpuii te pawh thubuaiah rìn luh a ni.

Thubuai ngaihtuahnaah sorkar lam thuhretu mi 24 thu zawhfiah a ni a, lehkha leh ṭul dang thil chi 308 lai court-ah phawrh a ni. Special Judge (PC Act) Dr HTC Lalrinchhana chuan Lydia Lalhruai-tluangi chu Prevention of Corruption Act Section 13(1)(a)&(b) leh Section 13(2) leh, IPC Section 406, 420, 468 & 471 tlawhchhanin thiam loh a chantir a; a chhungte erawh finfiahna a ṭhat tâwk loh vangin chhuah zalen an ni thung.

Lydia Lalhruaitluangi hi a hna aṭang hian August 21, 2018 khan bàn a lo ni tawh a ni.