KHAWTHLIR
Thisen pe
KṬP, Chawlhhmun Bial chuan nimin khan Civil Hospital, Aizawl tan thisen unit 50 an pe a, petute mipa 42 leh hmeichhia pakua an ni. KṬP, Venghnuai Branch pawhin Synod Hospital tan pein, mipa 12 leh hmeichhia pahnihin unit 14 an pe. CZ Higher Secondary School, Kolasib chuan Kolasib District Hospital tan thisen unit 60 an pe a, petute mipa 38 leh hmeichhia 22 an ni.
Mi 375-in vote thlak
Kumin MLA inthlanpuia Saiha leh Palak assembly constituency polling station hrang hranga duty tur polling official mi 375 chuan October 26, Ningani khan New Siahaa HSS leh MYA Hall-ah postal ballot hmangin vote an thlak.
Dawrkai enfiah
Election Commission of India thupek zûlzuiin Taxation department chuan MLA inthlan tur pualin nimin khan Siaha khawpuia dàwr leh kudam hrang hrang an enfiah. Dawrkaite'n bungrua an lak luhah felhlel a awm leh awm loh te, thil pangngai lo a awm leh awm lohte an enfiah a; bungrua felhlel emaw, rinhlelhawm emaw lak luh a awm loh thu an tarlang.
Internship hmang
College of Agriculture-a Bachelor of Science (Agriculture) zirlai pasarih chuan October 16-27 khan Kolasib-a Krishi Vigyan Kendra (KVK)-ah Rural Agricultural Work Experience (RAWE) internship programme an hmang a, nimin khan KVK, Kolasib training hall-ah khârna leh certificate semna hun hman a ni.
Zakapa thlàn lung
Sailulak NGO Coordination Committee leh Sailulak Khawchhuak Inzawmkhawm Pawl (SAIKIP) chuan an khaw lal Zakapa thlàna hriatrengna lungphun chu an phun ṭha. Zakapa hi Mizo nulate a chhanna lamah kum 1891 khan bawrhsap Marliana nen an intibuai a, man niin, Andaman Jail-ah a táng. Jail aṭanga a chhuah hnuah Sailulak khua a din a, kum 1914 khan a thi a ni.
Carpentry training
Assam Rifles chuan October 2-20, 2023 chhung khan Lawngtlai district-a Myanmar ramri hnaih khaw pathum - Laitlang, Zochachhuah leh Zorinpuiahte carpentry training an buatsaih. Training hi ramri hnaiha chengte thiamna tihpunna leh eizawnna ṭha an neih theihna atana buatsaih a ni a, ṭhalai mi 20 an tel a, bungrua an mamawh tur ṭhenkhat an pe nghal a ni.