Tropic of Cancer-in Khawzawl a tan tlangna lai zawng chhuak
Khawzawl DC Office-in ruahmanna a siam angin Geography Association of Mizoram (GAM) leh Champhai College-a Geography department chuan nimin khan Tropic of Cancer-in Khawzawl khaw chhung a tan tlangna hmun an zawng chhuak.
Tropic of Cancer (23 1/2° N)-in Khawzawl a tan tlangna hi hmun hnihah zawn chhuah a ni a; chu'ngte chu Khawzawl Hermon Presbyterian kohhran biak-in thlang (bûng hnuai) leh Neih-dawn kawngin NH-06 a pawhna hmàr lamah a ni.
Tropic of Cancer-in Khawzawl a tan tlangna hmunah hian chhinchhiahna ṭha leh felfai tak siam tum a ni a; hmun zawn chhuahnaah hian Khawzawl additional DC Lalfakzuala leh IPRO Lalchhuanawma Ralte te, Geography Association of Mizoram aṭangin Prof. Rualkhuma Colney, Dr C Nunsiamliani, Dr David B Lalhruaitluanga leh Dr PC Lalrohlua te, Champhai College aṭangin C Zirnghakngura leh Cicily VL Ruatpuii bakah zirlai 20 chuang an tel.