SSA hnuaia zirtirtute harsatna hi kan chingfel dawn - Lalsawta

Mizoram Pradesh Congress Committee (MPCC) president Lalsawta chuan, an party an sorkar a nih chuan SSA hnuaia zirtirtute harsatna an chinfel dawn thu a sawi.

Lalsawta hian nimin khan Congress Bhavan-a political session-ah thu sawiin, SSA zirtirtu lungawi lote'n high court-a sorkar an khinnaah an chak chungin, an duh ang MNF sorkarin a tihhlawhtlinsak thei lo niin a sawi a, "Congress party kan sorkar a nih chuan SSA zirtirtute harsatna hi kan chingfel ang," a ti.

Congress party an sorkar chuan SSA zirtirtute'n an hna ngai an thawh leh vek theih nan ruahmanna an siam dawn thu sawiin Lalsawta chuan, "Vawi leh khatah an zavaia kan thawhtir thei lo a nih pawhin a tahtawlin an hna ngai kan chelhtir leh ang tih ka tiam a ni," a ti bawk.

Congress President chuan, "Congress party hian dâwt kan sawi lo a, BJP hian kan Kristianna tidal tura an luhka atana regional party MNF an hman dante hi chhût chiang ila. ZPM pawhin sorkarna siam palh ta se BJP hmanrua tho tur an nih thu kan hriat fo tawh hi," a ti a; Congress party thlàwp chu Kristian nihna nen a inhmeh niin a sawi.