District hrang hrangah EVM chingfel

Champhai, Kolasib, Serchhip leh Saitualah nimin khan MLA inthlanpuia hman tur electronic voting machine (EVM) leh voter verified paper audit trail (VVPAT) hman tur thlanna leh siamremna hun hman a ni a, election official-te leh political party aiawhte an tel. EVM tihfel tawhte a dik ngei tih finfiah nan vote thlak chhin zel a ni.

Siahaah chuan DRDO conference hall-ah Saiha constituency-a hman tur EVM chinfel hna thawh a ni a, vawiinah Palak biala hman tur EVM thlan leh a ni ang.

Champhai North constituency-ah polling station (PS) 30, Champhai South constituency-ah PS 25 leh East Tuipui constituency-ah PS 29 a awm tih tarlan a ni. EVM leh VVPAT chinfelna hna hi vawiinah zawh tum a ni.

Kolasib district-ah chuan EVM hman tur thliar a ni a; EVM hman tur zat chu Tuirial bialah 26, Kolasib bialah 29 leh Serlui constituency-ah 34 a ni. Bial tinah hian thlaveng (reserve) tur dah a ni bawk.

Serchhip district-a constituency pathumah PS 88 a awm a, nimin khan PS tina thawn tur EVM leh VVPAT-te chu a siamtu Bharat Electronics Limited engineer-te'n an endik a, candidate-te symbol an bel nghal bawk.

Saitualah pawh DC conference hall-ah EVM commissioning hun hman a ni a, vawiinah zawh a ni ang.