Mualpho thup nana Lalduhoma bei char charah MNF party puh

ZPM Ṭhalai chuan thuchhuah siamin, sum chheprelh anga MNF-in ZPM chief minsterial candidate Lalduhoma an puh chu àwm lo an tih thu an tarlang a, an party mualpho thup nana Lalduhoma bei char charah MNF party an puh.

Rorel lai MNF party-in thu dik lo hmangin ZPM leader Lalduhoma an bei ngat ngat tih tarlangin ZPM Ṭhalai chuan, "Hei hian manifesto thar zawrh tur an neih lohzia a tarlang. "I eiru em?" tih zawhna chháng thei lo hruaitu hnuaia kal ngaihna hre lo party-in sum chheprelh anga Pu Lalduhoma an puh ve ngawt mai hi àwm lo kan ti hle. Mipuiin dâwta innghat party sorkar an paihthla dawn," an ti.

ZPM Ṭhalai chuan, Lalduhoma'n a MLA fund hmangin Serchhip bial chhunga mi harsa leh mamawhtute tan nasa takin hna a thawk nia sawiin, "A hre chiang bertu chu a bial mipui an ni. MLA zin loh bill la, kìr leh ta hauh lote chungchang sawi ngai lo a, thil ṭha zawk duha kìr leh ta chungchang an sawi duh viau mai hian dikna lama an thlen chin tàwizia a tarlang chiang hle," an ti a; thlei bik nei loa zin loh bill late zawng zawng pho chhuak ngam turin an phût tih an sawi.

ZPM ṭhalaite chuan, "Pathian leh mipui zah zo loa an thutiam bawhchhetu MNF party hian sorkar thar a pian an hlau hleah kan ngai a, mi rethei vote hmanga sum siam bànsan a, tihhlawhtlin theih loh tur thutiam hmanga mipui vote dil kual tawh lo turin kan chah a ni," an ti a; Lalduhoma chu hlemhlêtnaah a fihlim avangin Serchhip bial mipuiin hneh taka an thlan tlin leh ngei an rin thu an tarlang bawk.