April aṭangin electric hman man 4.02% a tihpun a ni dawn

Mizoramah electric hman man April aṭangin unit khatah 4.02% in a pung dawn. Electric hman man hi Power & Electricity department-in an ngen angin Joint Electricity Regulatory Commission (JERC) chuan an tisang a ni.

Power supply man sanna 4.02% hi sumdawnna atana hman ni lo (domestic), sumdawnna atana hman (non domestic), industry-a tana hman man, mi harsa zualte (Kutir Jyoti) hman man etc. sanna chawhrual a ni. Domestic, non domestic, industry etc.-ah hian power supply man tihpunna percentage a inang lo.

JERC hotute hnen aṭanga Vanglaini thu dawn danin, P&E dept. chuan JERC hnenah hian power tariff hi 8.21% a tihsan a dil a, JERC mipui ngaihdante la a, an zirchian hnuah 4.02% a tihsan turin thutlukna a siam a ni.

Tariff hman mekah chuan electric unit khat Rs. 3.98 a ni a, tihsan takah chuan unit khat Rs. 4.14 man a ni dawn a, a hma aia a sanna chu Rs. 0.16 a ni. P&E dept. rawtna angin power tariff hi 8.21% a tihsan nise chuan electric hman man hi unit khatah Rs. 0.33 in a sang ang.

P&E dept.-in document JERC-a an thehluh aṭanga a lan dan chuan electric hman man tlawm ber, mi harsa zual bik (Kutir Jyoti) hmang chhungkaw 16891 an awm. Kutir Jyoti-te hian thla thum chhungin unit 45 aia tam an hmang tur a nih loh bakah, an inah plug point a awm tur a ni lo.

Vanglaini palai zawhna chhang-in JERC chairman RK Kishore Singh chuan, electric hman man chu tihsan zeuh zeuh a ngaih thu sawiin, "Sorkarin power lakluhna atan sum tam tak a seng a, mipui hnenah subsidy-in a pe chhuak ṭhin. Subsidy a san lutuk chuan sorkar tan phurrit a ni. Chuvangin electric hman man tihsan zeuh zeuh a ngai a, vawi leh khatah tih-san vak erawh a ṭha lo," a ti.

JERC hotute sawi danin, electric hman man tihsan chungchanga mipui ngaihdan an laknaah, tihsan hrim hrim sawisel an awm loh laiin, domestic man erawh sang lutuk lo tura rawtna a awm.