Loneituten sorkar an rinchhan lutuk bansan a hun - Horticulture Minister

Loneitute tana thlai thar thawnchhuah tur sawngbawl dan ṭha zawk inzirtirna, ‘APEDA-CII FACE Cluster Development Program for Export of Horticulture Products’ chu nimin khan Aijal Club-ah neih a ni. Training hmanpuitu Horticulture minister PC Lalthanliana chuan, loneitute'n sorkar an rinchhan lutuk chu ban san a hun tawha a hriat thu a sawi.

Training hi Horticulture Department leh Agricultural and Processed Food Products Export Development Authority (APEDA) – Confederation of Indian Industry (CII)-in an buatsaih a ni.

Horticulture Minister, "Loneitute sorkar an rinchhan lutuk hi bansan a hun. Hnawthawh bul ṭan aṭanga a tawp thlenga sorkar beiseina rilru hi paih a ngai. Technical leh ṭul bik thil tak takah chuan loneitute hi sorkarin a pui ngei ang. Mah se, 100%-a sorkar rinchhana loneitute kal an tum chuan hlawhtlinna tluantling a awm ngai lo ang," a ti.

Rose, anthurium, iskut, sawhthing, hmarcha leh kuhva thawnchhuah a ni
ṭhin tih sawiin PC Lalthanliana chuan, "APEDA leh Mizoram sorkarin thil thar chhuahte thawnchhuah tur sawngbawl kawnga inremna an siam chu loneitute tan hlawkna a nih ngei ka beisei," a ti.

Thusawitu dang, APEDA-NE asst. general manager Sunita Rai chuan, APEDA chuan thlai tharte thianghlim leh ṭha zawk neih anih theihna atan hma lain, loneitute chu thlai/thei thianghlim leh ṭha chauh an thawnchhuah theihna atan an puih ṭhin thu a sawi.

Chawhnu lamah loneitu pualin training buatsaih a ni a, Mizoram Chamber of Industries president K Lalhmingthanga'n training buatsaih chhan a sawifiah.