Hmasawnna atan luhchilh bik neih a pawimawh - CM Hawla

Mizoram State Planning Board chu nimin khan Planning conference hall-ah an ṭhukhawm a, meeting kaihruaitu chief minister Lal Thanhawla chuan hmasawn tur chuan luhchilh bik neih a pawimawh thu a sawi.

Chief Minister chuan fumfe taka hmasawn tur chuan luhchilh bik nei a, hnathawh dan tur mumal tak duanga, thawhchhuah tur bituk neih ṭul a tih thu sawiiin, "Mizoram hi kan vannei hle. Industry lian nei lo mah ila tourism industry din theihna ṭha tak kan nei. Tuna kan neih sa aia changtlunga siam tur chuan keimahni ngei hian ngaihtuah thar neiha a, hmangchang kan hriat a ṭul," a ti.

Pipute rohlu kan neihte hi khualzinmite chuan a ngai ang anga an hmuh duh thu sawiin Lal Thanhawla chuan, "Keimahni hian tih tunlai kan tumna lamah chei danglamin a hlutna kan tichhia a, a vanduaithlak ṭhin hle a ni," a ti a, pipute rohlu a ngai ang anga chu tidanglam loa, a nihna ang anga humhalh tlat a ṭul thu a sawi.

Lal Thanhawla chuan mahnia eizawnna insiamna kawnga pawi-mawh skill development pawh chak taka kalpui anih thu sawiin, "NLUP aṭanga hlawhtlinna awm chho mekte hi a lawmawm hle. Sorkar chuan mau hi a hlawk thei ang bera hman ṭangkai anihna turin tunah hian China sorkar nen indawr mek a ni," a ti.

Meeting-ah hian intodelha hmasawn leh NLUP hlawhtlin chhoh zelna tura sorkarin ‘New Economic Development Policy’ a duan chu sawiho ber a ni.

NLUP leh central aṭanga sum hmuhte leh state sumte hi agriculture leh a kaihhnawih hnuaia kuthnathawktute nen thawhhona bul ṭan a, thlai chin uar bik neia link road siamte an sawiho a, mau leh handloom, handicrafts leh agro-based sawngbawlna lam chak taka bawhzui pawh ṭul, an ti.

Hmasawnna ruhrel pawimawh zual bik kawngpui, lei, kawlphetha, tui, ICT leh sanitation & sewerage-te chungchanga hmalak dan tur duan fel ni se, an ti a, social service sector lama hmalaknaah policy guidelines siam a, focus area neih theih nise an ti bawk.