Chapchar Kut Food Fest

Industries department buatsaih, ‘Chapchar Kut Food Fest 2016’ chu nimin khan Lammual basketball court-ah Industries minister H Rohluna'n a hawng.

H Rohluna chuan nikum thleng khan food fest hi National Mission on Food Processing (NMFP) sum hmanga buatsaih ṭhin a nih thu sawiin, "Kuminah erawh chuan sorkar laipuiin NMFP scheme a tihtawp tak avangin sum lamah harsatna tlem an tawk a, food fest kalpui chhunzawm a nih theih nana department-in theihtawp an chhuah a, hei hi kuthnathawktuten a rah an seng dawn a ni," a ti.

Ei leh in siam pawimawhna sawiin Industries Minister chuan, "Mihring hriselna nghawng thei a nih avangin uluk a ngai hle a; chutih rual erawh chuan tui tak leh tuihnai taka siam thiam a ngai a ni,” a ti a, Mizo kutchhuak ei tur leh puantahte chu ram pawn thlenga thawn chhuah tlak a nih avangin sorkar laipuiah ruahmanna (Proposal) thlen a nih tawh thu a sawi.

Chapchar Kut Food Fest hi kum 2014 aṭanga buatsaih ṭan a ni a, kumin hian food processing stall 13 leh food service stall 11 hawn a ni.