Industries dept.-te'n awmze nei zawka Thil siam dan zirna an buatsaih

Thil siam dan awmze nei zawka kalpui (Lean manufacturing) chungchang zirna nimin khan Horticulture dept. conference hall-ah buatsaih a ni a, parliamentary secretary (Industries) Joseph Lalhimpuia'n a hmanpui.

Joseph Lalhimpuia chuan, hautak lo, tlo leh hlawk zawk sia thil siam chhuah dan inzirtirna buatsaih a ni chu lawmawm a tih thu sawiin, "Thil siam chhuah lama hmasawn zel turin Industries department-in theihtawp a chhuah mek a, central scheme la hai chhuah loh hrang hrang hai chhuak turin ṭan lak mek a ni," a ti.

Parliamentary Secretary chuan Myanmar-ah mipui thlan sorkar a din ṭan avangin Mizorama hnathawk tam tak an haw chho ṭan tih sawiin, "Puantah leh thil siam chi hrang hrangah a ram mi ngeite thawk thei tura inbuatsaih a ngai a ni," a ti a, industry neitute chu Mizo puan hmanga thil siam uar turin a chah.

Awareness programme hi Mizoram sorkar hnuaia Bamboo Development Agency (BDA) leh Quality Council of India ṭang kawp buatsaih niin,National Accreditation Board for Education Training (NABET)-a executive officer (Trainee) Kamakhya Basumatary-a chuan thil pawimawh hrang hrang kalkhawmte a zirtir.

Lean manufacturing hian a tum chu thil siam chhuah kawnga thil ṭul lo, hun tihektu zawn chhuah a, hun rei lo zawk chhunga product quality ṭha zawk siam chhuah theih a ni.

Micro, Small & Medium Enterprises chuan Lean manufacturing pawimawhzia hriain, National Manufacturing Competitiveness Programme hnuaiah Lean Manufacturing Competitiveness Scheme a duang a, NABET, Quality Council of India chu implementing agency an ni.

He scheme hian cheng nuai 30 (80% of total project cost) thleng consultant rawih man a tum thei a, a dang 20% erawh chu a ruaitu emaw state sorkar emaw tum tur a ni thung.